Exynos 2600 flaqman prosessoru Geekbench testlərindən keçib

     Samsung şirkəti hal-hazırda Exynos 2600 flaqman prosessoru üzərində çalışır. İndi isə məlum olub ki, hazırlanan bu yeni prosessor Geekbench testlərindən keçib. Geekbench-in məlumatlar bazasına əsasən Exynos 2600 prosessoru özündə 1 ədəd 3.55 GHz tezlikli supernüvəni, 3 ədəd 2.96 GHz tezlikli nüvəni və 6 ədəd 2.46 GHz tezlikli nüvəni birləşdirir. Prosessorun qrafik imkanlarından isə Xclipse 960 qrafik çipi cavabdehdir. Beləliklə prosessor Geekbench-in birnüvəli testi çərçivəsində 2155 xal, çoxnüvəli testi çərçivəsində isə 7788 xal toplayıb. Bu göstəricilər daha əvvəlki model olan Exynos 2500-ın göstəricilərindən sadəcə bir qədər yüksəkdir. Bu isə Geekbench testlərindən Exynos 2600-ın ilkin versiyasının keçməsi ilə izah oluna bilər. Qeyd etmək lazımdır ki, gözləntilərə əsasən Exynos 2600 ilk dəfə gələn ilin əvvəlində təqdim olunacaq Galaxy S26 seriyasında istifadə ediləcək.