“Samsung” şirkəti, rəsmi olaraq Galaxy S8-in daha dözümlü versiyası olan Galaxy S8 Active modelini təqdim etdi.

Bu versiya, aktiv həyat tərzi sürən insanlar üçün nəzərdə tutulub. Onun korpusu metal çərçivələrdən ibarətdir və o çox dözümlüdür. Beləliklə smartfon, 1.5 metr hündürlükdən düz səthə düşən zaman ona heç bir zərər dəymir. Sudan və tozdan qorunma özəlliyi isə IP68 standartı üzrə qurulub. Bu isə o deməkdir ki, smartfonun daxili hissəsinə toz dənəciyi belə daxil ola bilməz və o, suyun altından belə çalışa bilər. Bundan əlavə olaraq 5.8 inç-lik Super AMOLED ekran, əlavə olaraq Corning Gorilla Glass 5 şüşəsi ilə qorunur. Ümumilikdə isə Galaxy S8 Active modelinin dözümlülüyü, MIL-STD-810G hərbi standartına uyğun gəlir. Smartfonun daha dözümlü versiyasının ən böyük özəlliyi, onun batareya həcminin böyüməsində oldu. Belə ki, Galaxy S8 Active modeli, 4000 mAh enerji tutumlu batareya ilə təchiz olunub. Digər göstəricilərinə görə isə o, adi Galaxy S8 ilə eynidir.