Google-dan 4K ekranlı premium Chromebook modeli gəlir

    Görünür, yaxın zamanda Google şirkəti öz tarixi boyunca ən diqqətə layiq Chromebook modelini təqdim edəcək. Belə ki, yeni Chromebook modeli haqqında məlumat internetdə ortaya çıxıb. Ortaya çıxan məlumata əsasən Atlas kod adlı yeni Chromebook modeli 4K keyfiyyətində ekrana sahib olacaq. Sözügedən cihaz ChromeOS əməliyyat sistemli cihazlar seriyasında premium səviyyəli olacaq.

    4K ekrana sahib olacaq Atlas kod adlı yeni Chromebook modeli Reddit saytının nbsp ləqəbli istifadəçisi tərəfindən aşkar edilib. O, Atlas haqqında məlumatı Chromium OS üçün olan Google Git sistemində aşkar edib. Yeni Chromebook-un 4K ekranına sahib olacağından başqa heç bir məlumat yoxdur. Bundan əlavə olaraq məlumatlar arasında bir neçə digər cihazların da varlığı qeyd olunub. Onlardan biri 2400x1600, digəri isə 1536x2048 piksel keyfiyyətli ekrana sahib olacaq.