Biiraz öncə “Google” tərəfindən keçirilmiş tədbir çərçivəsində Pixel və Pixel XL modellərinin ikinci nəsli təqdim olundu.

Keçən ilki modellərdə olduğu kimi yeni modellərin kameraları da DxOMarlc mütəxəssisləri tərəfindən yüksək qiymətləndirilərək 98 xala laiq görüldülər. Bununla yanaşı Pixel 2 və Pixel 2 XL modelləri həmçinin yenilənmiş dizayna, proqram funksiyalarına və Android sisteminə sahibdirlər. Ən böyük marağı oyadan model məhz Pixel 2 XL-dir. Belə ki, məhz o, ən yeni sistem funksiyalarını özündə birləşdirir. Şirkət, çərçivəsiz ekran trendindən geri qala bilməzdi.

Bənzər xəbər

Android 6.0 Marshmallow alacaq olan cihazlar! Qarşılayın!

Buna görə də Pixel XL 2, 6 inç-lik QHD OLED ekranla təchiz olunub. Smartfonun çərçivələri rekord dərəcədə nazik olmasalar da, bir qədər nazikdirlər. Bununla yanaşı smartfon ön tərəfdən səsgücləndiricilərə sahibdir. Çox güman ki, şirkət onları, 3.5 mm-lik audiogirişin əvəzinə yerləşdirib. Qeyd etmək lazımdır ki, hər iki smartfonda sözügedən ənənəvi audiogiriş özəlliyi yoxdur. Bir tərəfdən baxanda yeni smartfonların dizayn konsepsiyası dəyişilməz olaraq qaldı. Keçən ilki modellər kimi yeni modellər də metal korpusa və arxa panel tərəfdə qoruyucu şüşəyə sahibdirlər. Barmaq izi skanı isə dəyişilməz olaraq arxa paneldə yerləşib.

Lakin yeni smartfonlarda IP67 standartlı sudan qorunma özəlliyi əlavə edilib və onların hər ikisi də Always on Display funksiyasını dəstəkləyir. Texniki göstəricilərinə gəldikdə isə Pixel 2 XL, 8 nüvəli Snapdragon 835 prosessoru, 4 GB RAM, 64/1278 GB daxili yaddaş və 3520 mAh enerji tutumlu batareya ilə təchiz olunub. Adi Pixel 2 modeli isə Pixel 2 XL kimi çərçivəsiz ekrana sahib deyil. Bunun əvəzində o, 5 inç-lik Full HD ekran ilə təchiz olunub.

Texniki göstəricilərinə görə isə Pixel 2, Pixel 2 XL ilə eynidir. Sadəcə olaraq batareya həcmləri fərqlidir. Belə ki, Pixel 2, 2700 mAh enerji tutumlu batareya ilə təchiz olunub. Hər iki smartfon, sürətli enerji yığma özəlliyini dəstəkləyir və USB Type-C girişinə sahibdir. Keçən ilki modellər həmçinin yaxşı keyfiyyətli foto və video çəkimi ilə də seçilirdilər. Yeni modellərdə nəinki ikili kamera özəlliyi yoxdur, həmdə onlar keçən ilki modellərdə olduğu kimi qaldılar. Yəni hər iki smartfon, 12 MP-lik arxa və 12 MP-lik ön kamera ilə təchiz olunub. Lakin buna baxmayaraq onların keyfiyyətlərinin yükəsəlməsi, proqram təminatı yolu ilə mümkün olub.

Belə ki, yeni modellərdə olan kameralar, portret rejimini, üz keyfiyyətlərinin yaxşılaşdırılması funksiyasını və “Apple”da olan Live Photo özəlliyinin analoqunu dəstəkləyirlər. Bütün  bunlara baxmayaraq bu seriyanın smartfonları, alıcıları əsasən Android sistemindəki özəllikləri ilə cəlb edir. Belə ki, keçən ilki versiyalarda istifadəçilər Google Photo servisində istədikləri miqdarda foto və videoları, olduqları keyfiyyətdə saxlaya bilirdilər. Bu funksiya, yeni model smartfonların istifadəçiləri üçün də aktiv olacaq. Bununla yanaşı hamımıza HTC U11-dən tanış olan Active Edge funksiyası, bu smartfonlara da əlavə olunub.

Bundan sonra istifadəçi yeni modellərin korpuslarını sıxaraq müəyyən əməliyyatları işə sala biləcəklər. Məsələn belə üsulla Google Assistant səsli köməkçisini işə salmaq olar. Bundan əlavə olaraq yeni smartfonlara həmçinin musiqinin tanınması funksiyası əlavə olunub. Təbii ki, bunun üçün Shazam kimi məşhur tətbiqdən istifadə etmək olar. Lakin tətbiqi işə salmaq vaxt itkisidir. Yeni smartfonlarda olacaq bu yeni funksiya isə sizin ətrafınızda səslənən musiqiləri daim dinləyəcək və onların adlarını ekranda əks etdirəcək. Təbii ki, funksiyanı dekativ və ya onun işini məhdudlaşdırmaq mümkündür. Ən əsası isə onu qeyd etmək lazımdır ki, hər iki smartfon, Android 8.0 Oreo əməliyyat sistemi vasitəsilə çalışacaq. Beləliklə daxili yaddaşdan asılı olaraq Pixel 2, 649$ və 749$ qiymətinə, Pixel 2 XL  isə 849$ və 949$ qiymətinə satılacaq.

Yeni smartfon modellərindən başqa şirkət həmçinin Pixelbook adlı hibrid noutbook modelini də təqdim etdi. Bu, Google Assistant səsli köməkçisini dəstəkləyən ilk noutbook modelidir. Beləliklə şirkət, Chromebook seriyasından vaz keçərək tamamilə yeni seriyaya start verdi. Həmişəki kimi şirkət, əməliyyat sistemi kimi Chrome OS-dən istifadə etdi.

Cihazın performansından isə Intel mobil prosessoru cavabdehdir. Google Pixelbook, 12.3 inç-lik sensorlu Quad HD ekranla təchiz olunub. Sensorlu idarəetmədən əlavə olaraq Pixelbook həmçinin Pixelbook Pen stilusunu da dəstəkləyir. Sözügedən stilus, ekrana klikləmə gücünü təyin edir və 60 dərəcəlik əyilmə bucağını dəstəkləyir.nNoutbookun korpusu, 4 rejimdə çalışmaq üçün imkan yaradır. Pixelbook-un qalınlığı 10 mm, çəkisi isə 1 kq-dır. Texniki göstəricilərinə gəldikdə isə Pixelbook, Intel Core i5 və i7 prosessorları ilə təqdim olunur.

Bununla yanaşı o, 16 GB RAM və 128/256/512 GB SSD daxili yaddaşı ilə təchiz olunub. Noutbook-un batareyası, 10 saata kimi çalışmağa imkan verir. USB Type-C girişi vasitəsilə 15 dəqiqəlik şarj prosesi sayəsində isə Pixelbook, 2 saat şarjsız çalışa bilər. İlk dəfə olaraq şirkət, noutbooku, Assistant süni zəka servisi ilə inteqrasiya edib. Səsli köməkçi, istifadəçinin suallarına cavab verir, ekrandakı məlumatları oxuyur və şəbəkədə lazımi məlumatları tapır.

Bununla yanaşı yaxınlıqda şəbəkə olmayan zaman, Pixelbook, avtomatik olaraq Pixel smartfonu vasitəsilə internetə qoşulur. Minimal texniki göstəricilərə sahib versiya, 999$ qiymətində satışa çıxacaq. Pixelbook Pen isə komplektə daxil olamayaq və onu ayrıca 99$ qiymətinə almaq mümkün olacaq. Pixelbook, 31 Oktyabr tarixində satışa çıxacaq.

“Google” həmçinin Pixel Buds adlı maraqlı naqilsiz qulaqlıqları da təqdim etdi. Assistant səsli köməkçisini dəstəkləyən bu qulaqlıqlardan istifadə zamanı, smartfona gəlmiş bildirişləri oxumaq üçün onu, cibdən çıxartmağa ehtiyac qalmayacaq. Qulaqlıqlar hər bir musiqi janrına uyğunlaşır və buna görə də musiqi tamamilə aydın şəkildə eşidilir.

Sözügedən qulaqlıqların daha bir maraqlı özəlliyi isə tərcüməçi funksiyasına sahib olmasıdır. Belə ki, bu qulaqlıqlar, istifadəçiyə yad olan dildə söylənmiş sözləri və ya cümlələri, real zaman ərzində tərcümə edir (40 dil dəstəklənməsi). Pixel Buds qulaqlıqları, Noyabr ayında 159$ qiymətinə satışa çıxacaq.