Həvəskar şəxslər YouTube videosuna baxmaq üçün 12 ədəd dial-up modemdən istifadə ediblər (VİDEO)

     1/4 əsr əvvəl genişzolaqlı internet bağlantısı barədə yəqin ki, heç kim düşünmürdü. O vaxt ən mükəmməl sayılan texnologiya 56 Kbit/s sürətlə dial-up kanalı vasitəsilə işləmək idi. Bununla yanaşı, bir neçə modemin paralel qoşulması və nəzəri cəhətdən daha çoxunun istifadəsi də mümkün idi. Bu gün saytlar və servislər o qədər ağırlaşıb ki, artıq 100 Mbit/s sənayedə tövsiyə olunan minimum göstəricidir. Amma bəs 2000-ci illərin əvvəlində bu sürətə heç olmasa bir qədər yaxınlaşmaq olardımı? The Serial Port adlı YouTube kanalının müəllifləri köhnə dial-up modemlərindən ibarət yığın vasitəsilə axınlı videoya baxmaq imkanını yoxlamaq qərarına gəliblər. Bunun üçün uyğun aparat və proqram təminatı seçilib. Müəlliflər dərhal daxili modemlərdən istifadə ideyasını kənara qoyublar.

     Məsələn, Diamond Multimedia Shotgun genişlənmə kartları - bunlar iki daxili modemi olan PCI-adapterlərdir. Belə kartlar geniş yayılmayıb və onların sazlanması kifayət qədər çətin olub. Modemlərin qoşulması üçün strategiya olaraq PC-də çoxsaylı COM-portlardan istifadə edilib və Multilink PPP protokolunun genişləndirilməsi tətbiq olunub, bu da Windows XP ilə yaxşı uyğunluq göstərib (təcrübə müəlliflərinin Windows ME üzərində sınaqları isə uğursuz alınıb). Telefon xətləri isə Cisco VoIP avadanlığı vasitəsilə simulyasiya olunub. Kompüterə bir neçə COM-portlu iki PCI kartı quraşdırılıb və hər bir porta ayrıca dial-up modem qoşulub. Təcrübə iştirakçıları modulların qarşılıqlı konfliktə girməməsi üçün portlarda və modemdə DIP-keçidlərinin kombinasiyalarını qurmaqla kifayət qədər əziyyət çəkiblər.

     Nəticədə ümumilikdə 12 modem eyni vaxtda qoşulub və sınaqdan keçirilib. Təqdim olunmuş təcrübə videosunda işləyən dial-up modeminin səsi ilə nostalji yaşamaq olar, üstəlik burada eyni anda 12 modem işləyirdi. Nəticədə 668.8 kbit/s bağlantı sürətinə nail olunub və YouTube-dan videolara buferləşmə olmadan, baxmayaraq ki, müəyyən ləngimələrlə, baxmaq mümkün olub. Amma 2004-cü il istehsalı bir PC-dən başqa nə gözləmək olar? Təcrübə iştirakçılarının fikrincə, onlar yəqin ki, kommutasiya olunmuş kanallar vasitəsilə eyni vaxtda bir neçə modemin işləməsi üzrə dünya rekordu qırıblar. Onlar bununla dayanmaq niyyətində deyillər və yeni rekordlara nail olmağa çalışacaqlar, çünki Multilink PPP eyni vaxtda qoşula bilən modemlərin sayına görə nəzərəçarpacaq məhdudiyyətlərə malik deyil.