İnsanabənzər Atlas robotu Hyundai şirkətinin zavodunda işə başlayıb

Elm & Texnologiya

10.03.2025

Emil

Təxminən 1 il əvvəl Boston Dynamics şirkəti tam elektriklə işləyən Atlas robotunu təqdim etdi. Bu yeni model, hidravlik sistemli əvvəlki Atlas modelindən daha sürətli, güclü və çevik oldu. 1 il ərzində aparılmış təcrübələr və təlimlər nəticəsində şirkət Atlas üçün ən uyğun iş sahələrindən birini müəyyənləşdirdi. Konveyer istehsalatında anbar işçisi kimi fəaliyyət göstərmək. Atlas artıq Hyundai avtomobil montaj zavodunun kollektivinə uğurla inteqrasiya olunub və digər şirkətlərdə də işləməyə hazırdır. Montaj konveyeri üçün detalların çeşidlənməsi - rutin, təkrarlanan, lakin vacib və kifayət qədər çətin bir tapşırıqdır.

Detallar müəyyən bir ardıcıllıqla xüsusi bölmələrə yerləşdirilməlidir. Bu, hər gün montaj olunan avtomobil modellərinə uyğun aparılmalıdır. Eyni istehsal xəttində bir neçə fərqli modelin yığılması mümkündür, buna görə hər model üçün düzgün komplektasiyanı seçmək vacibdir. İstehsal prosesində çoxlu müxtəlif komponentlər iştirak edir, bu isə yaxşı yaddaş və anbar sahəsində sürətli naviqasiya bacarığı tələb edir. Robot üçün məlumatları yadda saxlamaq və məkan daxilində naviqasiya etmək problem yaratmır, lakin dəyişən mühitə uyğunlaşmaq çətindir. Mövcud çətinliklər:

- Komponentlər dərin konteynerlərə yerləşdirilir, bu isə robotun bütün hissələri eyni bucaqdan görməsini çətinləşdirir.

- Robot hər zaman detalları tam nəzərdən keçirə bilmir və bəzi yerlərə baxış imkanı məhdud ola bilər.

Effektiv işləmək üçün robot aşağıdakı fiziki bacarıqlara sahib olmalıdır:

- Əyilmək və çökmək.

- Bədənini uzatmaq və elastik hərəkət etmək.

- Fərqli ölçü və çəkiyə malik obyektləri idarə etmək və konteynerlərə yerləşdirmək.

İnsan üçün bu əməliyyatları yerinə yetirmək daha asandır, lakin iş eyni tipli hərəkətlərin sonsuz təkrarlanmasına çevrildikdə, bu, psixoloji gərginlik yaradır. Boston Dynamics komandası elektrikli Atlas robotunu təxminən 1 il ərzində anbar işçisi kimi işləməyə öyrədib və müəyyən uğurlar əldə edib. Bunu şirkətin təqdim etdiyi video materialdan da görmək mümkündür. Qeyd etmək lazımdır ki, Atlas robotunun anbar işçisi kimi öyrədilməsi nisbətən sadə proqramlaşdırma üsulları ilə həyata keçirilməli idi. Bu halda güclü süni zəka sistemlərinin və neyron şəbəkələrinin istifadəsi artıq olardı. Boston Dynamics, robotun logistika sahəsində işləyə bilməsi üçün nisbətən sadə alqoritmlər hazırlayıb. Bunun üçün mürəkkəb tapşırıqlar daha sadə addımlara bölünüb. Nəticə olaraq robot Hyundai-nin montaj xəttində uğurlu nəticələr göstərib. Boston Dynamics artıq digər şirkətlərdən də oxşar “metal işçilər” üçün sorğular almağa başlayıb.

Mənbə: Boston Dynamics

Paylaş

boston dynamics atlas

robototexnika

Bənzər xəbərlər