Marsdakı sirli sarı kristalların mənşəyi ilə bağlı yeni izah ortaya çıxıb

    Alimlər Marsın səthində aşkarlanan sirli sarı kükürd kristallarının necə yarandığını izah etməyə bir addım daha yaxınlaşıblar. 2024-cü ildə NASA-nın Curiosity Rover aparatı Gale kraterində hərəkət edərkən təsadüfən bir qayaya toxunub və onu sındırıb. Qayanın içərisində isə parlaq sarı rəngli, saf kükürd kristalları ortaya çıxıb. Sonradan məlum olub ki, bu, tək bir qaya deyil, təxminən 45 metr uzunluğunda geniş bir kükürd sahəsidir.

    Yer üzündə təbii kükürd adətən vulkanik qazlar, isti bulaqlar və bəzi hallarda bakteriyaların fəaliyyəti nəticəsində əmələ gəlir. Marsda isə bu proseslərin izlərinə rast gəlinmədiyi üçün alimlər uzun müddətdir bu kristalların mənşəyini izah etməkdə çətinlik çəkirdilər. Bununla belə, tədqiqatçılar yeni bir ssenari irəli sürüblər. Onların fikrincə, Marsın səthinə düşən böyük bir meteorit yeraltında mövcud olan kükürd yatağını əridib. Zərbənin yaratdığı yüksək temperatur nəticəsində maye halına keçən kükürd bir neçə kilometr aşağı axaraq sonradan soyuyub və Curiosity-nin aşkar etdiyi bərk kristallara çevrilib.

    Bu nəzəriyyə təsdiqlənərsə, Marsın geoloji keçmişi və planetdə baş vermiş qədim proseslər haqqında mühüm məlumatlar əldə etmək mümkün olacaq. Eyni zamanda, bu kəşf Qırmızı Planetdə həyatın izləri ilə bağlı əvvəlki ehtimallara da yeni baxış gətirə bilər.