Counterpoint Research analitik şirkəti smart saatlar bazarını analiz edərək bu ilin ilk yarısında alıcıların daha çox hansı brendlərin məhsullarına üstünlük verdiklərini öyrənib. Mütəxəssislər qeyd ediblər ki, pandemiyaya baxmayaraq smart saatlar bazarındakı satışlar diqqət çəkəcək dərəcədə yüksəliblər. Şirkətlərdən biri isə bu bazarın yarısını ələ keçirtməyi bacarıb. Bu barədə 4pda saytı xəbər verib. Beləliklə bu ilin ilk yarısında satılmış smart saatlar üzrə liderliyi Apple şirkəti qazanıb.

    Belə ki, sözügedən bazarın 51.4%-i onun əlindədir. Növbəti yerlərdə Huawei və Garmin şirkətləri qərarlaşıblar. Bu iki şirkətin payına ümumilikdə bazarın 17.7%-i məxsusdur. İlin əvvəlindən ortasına kimi Apple Watch seriyasının satışları 43%-dən 50%-ə yüksəlib. İlk 6 ay ərzində bütün dünyada ümumilikdə 42 milyon ədəd cihaz satılıb. Ən çox satılanlar sırasında Apple Watch Series 5 və Series 3 modelləri olublar.

    Satışların bu cür kəskin artmalarının əsas səbəbi kimi mütəxəssislər məhz koronavirus pandemiyasında görürlər. Belə ki, evlərində daha çox zaman keçirən insanlar öz səhhətləri barəsində daha çox fikirləşməyə başlayıblar. Buna görə də onlar smartfon əvəzinə smart saat almağa üstünlük veriblər. Beləliklə Hindistanda 2019-cu il ilə müqayisədə bu il daşınıla bilən cihazların satışları 57%, Avropada 9%, ABŞ-da isə 5% yüksəlib.

    Çində ən çox satılan smart saat modeli kimi Huawei Watch GT2 olaraq qalır. Ümumilikdə isə Çində və Asiya regionunda Huawei şirkətinin cihazlarının satış göstəriciləri 90%, bütün dünyada isə 57% yüksəlib. Garmin Forerunner və Fenix smart saat modelləri daha çox Avropada və Şimali Amerikada məşhurluq qazanıblar. Bu cihazların üzərlərinə düşən ümumi satış göstəricisi 31% yüksəlib.