NASA-nın Endeavour kosmik gəmisi bu ilin sonunda yeni muzeydə nümayiş olunacaq

    ABŞ-nin Kaliforniya Elm Mərkəzi NASA-nın əfsanəvi Endeavour kosmik gəmisinin 13 noyabr 2026-cı il tarixindən etibarən yeni Samuel Oschin Hava və Kosmos Mərkəzində daimi olaraq nümayiş etdiriləcəyini açıqlayıb. 200 min kvadrat fut sahəni əhatə edən yeni mərkəzdə Endeavour ilə yanaşı, 100-dən çox tarixi aerokosmik eksponat da sərgilənəcək. Ən diqqətçəkən yenilik isə kosmik gəminin ilk dəfə buraxılışa hazır vəziyyətdə, bərk yanacaq gücləndiriciləri və xarici yanacaq çəni ilə birlikdə nümayiş etdirilməsi olacaq.

    Ziyarətçilər həmçinin 140 fut hündürlüyündə xüsusi lift vasitəsilə kosmik gəminin yanına qalxaraq, astronavtların uçuşdan əvvəl yaşadığı təcrübəni hiss edə biləcəklər. Endeavour kosmik gəmisi 1986-cı ildə baş verən Challenger faciəsindən sonra onun əvəzinə hazırlanıb və 1992-ci ildən etibarən bir sıra mühüm missiyalarda iştirak edib. Gəmi peyklərin orbitə çıxarılması və təmiri, Hubble Kosmik Teleskopunun servis missiyaları, həmçinin Beynəlxalq Kosmik Stansiyaya astronavtların daşınması kimi vacib vəzifələri yerinə yetirib.

    NASA Endeavour-u 2011-ci ildə rəsmi olaraq istismardan çıxarıb və bir il sonra onun Los-Ancelesdə daimi olaraq sərgilənəcəyini elan edib. Kosmik gəmi həmin il Los-Anceles Beynəlxalq Hava Limanından Kaliforniya Elm Mərkəzinə 12 millik xüsusi marşrutla daşınaraq indiki məkanına gətirilmişdi.