NASA-nın Nancy Grace Roman teleskopu “qaranlıq kainatı” araşdırmaq üçün kosmosa göndərildi

    NASA-nın yeni Nancy Grace Roman Kosmik Teleskopu qaranlıq maddə, qaranlıq enerji və kainatın digər sirlərini araşdırmaq üçün kosmosa göndərilib. Teleskop NASA-nın Kennedi Kosmik Mərkəzindən SpaceX-in Falcon Heavy raketi ilə orbitə çıxarılıb. NASA buraxılışdan qısa müddət sonra Roman teleskopunun günəş panellərini və aşağı cihaz günəş qoruyucusunu uğurla açdığını təsdiqləyib.

    Qarşıdakı günlər və həftələr ərzində teleskopun digər avadanlıqları da açılaraq aktivləşdiriləcək. Tam fəaliyyətə başladıqdan sonra Romanın gündə təxminən 1,4 terabayt məlumat Yerə göndərməsi gözlənilir.

    Nancy Grace Roman teleskopunun ilk görüntülərinin 2027-ci ilin əvvəlində əldə ediləcəyi gözlənilir. NASA-nın Elm Missiyası Direktorluğunun rəhbəri Niki Foksun sözlərinə görə, Roman teleskopu kainatın tarixi ilə bağlı ən fundamental suallara cavab tapmağa kömək edəcək. Teleskopun geniş görüntü sahəsi və yüksək müşahidə sürəti kosmosun daha böyük hissəsini daha qısa müddətdə araşdırmağa imkan verəcək.

    Romanın əsas məqsədlərindən biri qaranlıq maddə və qaranlıq enerjini daha yaxşı anlamaqdır. Bundan əlavə, teleskop ekzoplanetləri və planetlərin formalaşdığı diskləri də müşahidə edəcək.

    NASA bildirir ki, missiya boyunca teleskop 1 milyard qalaktikanın işığını ölçə bilər. Bu məlumatlar alimlərə kainatın quruluşunu, inkişafını və görünməyən komponentlərini daha yaxşı öyrənməyə imkan verəcək.