NASA Swift teleskopunu xilas etmək üçün təcili kosmik missiya başladıb

    ABŞ-nin Milli Aeronavtika və Kosmos Agentliyi (NASA) orbitini itirmək təhlükəsi ilə üzləşən Swift Kosmik Rəsədxanasını xilas etmək üçün təcili missiyaya start verib. 2004-cü ildə orbitə göndərilən teleskop son aylarda güclü Günəş fırtınalarının təsiri nəticəsində Yerə daha da yaxınlaşıb və hətta bu il atmosferə daxil olaraq yanıb məhv olma riski ilə qarşılaşıb.

    Bu təhlükənin qarşısını almaq üçün NASA, Katalyst Space Technologies şirkəti ilə əməkdaşlığa başlayıb. Şirkətin "Link" adlı kosmik aparatı cümə günü orbitə buraxılıb. Missiyanın əsas məqsədi hərəkət sistemi olmayan Swift teleskopuna çatmaq və onun orbitini yenidən yüksəltməkdir. Hazırda Swift Yer ətrafında təxminən 360 kilometr (224 mil) yüksəklikdə dövr edir. "Link" aparatı isə teleskopun orbitini əlavə 240 kilometr (150 mil) artıraraq onu yenidən təhlükəsiz hündürlüyə çıxarmağı planlaşdırır.

    Missiyanın diqqətçəkən tərəfi onun rekord qısa müddətdə hazırlanmasıdır. NASA-nın hesablamalarına görə, Swift oktyabr ayına qədər xilas edilməsəydi, artıq çox gec ola bilərdi. Buna görə də layihə cəmi doqquz ay ərzində hazırlanıb və təxminən 30 milyon dollara başa gəlib. Təxminən 500 milyon dollar dəyərində olan Neil Gehrels Swift Rəsədxanası əsasən qamma-şüa partlayışlarını araşdırır. Bu müşahidələr alimlərə kainatın ilk dövrlərini və ulduzların təkamülünü daha yaxşı anlamaqda mühüm məlumatlar təqdim edib. Əgər missiya uğurlu alınarsa, bu, köhnə peyklərin və kosmik teleskopların orbitdə saxlanılması üçün yeni bir texnologiyanın praktiki istifadəsinə çevrilə bilər.