Neuralink gələn ay insan fikirlərini mətnə çevirə bilən beyin implantının testlərinə başlamaq istəyir

     Bəzi xəstəliklər insanı nitq aparatının əzələlərinə nəzarətdən məhrum edir və nəticədə o, ətrafdakılarla tam ünsiyyət qurmaq imkanını itirir. Neuralink şirkəti gələn ay insana sözün əsl mənasında fikirləri vasitəsilə elektron cihazlarda “mətn yığmağa” imkan verəcək beyin implantının klinik sınaqlarına başlamağı planlaşdırır. Əslində, artıq kəllə qutusuna implant yerləşdirilmiş Neuralink pasiyentlərindən biri kompüterdə yaxınlarına müraciət məktubları yazmaq üçün bu imkandan istifadə edir, lakin əsasən klinik sınaqlarda iştirakçılar kompüterdə işləyərkən siçanın kursorunu idarə etməyə yönəlirlər. Onlardan biri hətta sənaye dizaynı sahəsində işləyir və neyroimplant ilə kompüterdən ibarət birləşmədən istifadə edir. Bloomberg-in qeyd etdiyi kimi, 2030-cu ilə qədər Neuralink həmçinin öz implantının ilk sağlam insana yerləşdirilməsi üçün icazə almağa ümid edir.

     Bu barədə Cənubi Koreyada keçirilmiş konfransda çıxışı zamanı Neuralink-in prezidenti Dongjin Seo məlumat verib. Bu ilin oktyabrında başlayacaq klinik sınaqların yeni mərhələsinin məqsədi sinir impulslarını birbaşa sintez edilmiş nitqə çevirməkdir. Görünür ki, bunun üçün Neuralink-in beyin implantının hələ rəsmi olaraq ABŞ tənzimləyiciləri tərəfindən təsdiqlənməmiş yeni modifikasiyasından istifadə ediləcək. Sadəcə, konkret klinik sınaqlar çərçivəsində mövcud qaydalardan istisna ediləcək. Ümumilikdə şirkət hazırda 5 fərqli klinik sınaq aparır. Hazırda bazarda insanın düşüncələrini birbaşa mətnə çevirməyə imkan verən cihaz yoxdur. Nəticə etibarilə, şirkətin prezidentinin etiraf etdiyi kimi, Neuralink öz implantları ilə istehlak bazarına çıxmaq istəyir. Bu isə onların tamamilə sağlam insanlara da quraşdırıla biləcəyini nəzərdə tutur.

     Hazırda Neuralink cihazları yalnız virtual klaviaturadan istifadə etməklə mətn formalaşdırmağa imkan verir, burada pasiyent hər bir simvolu düşüncə gücü ilə ayrıca seçir. Düşüncənin birbaşa mətnə çevrilməsi isə məlumatın ötürülməsini xeyli sürətləndirəcək. Gələcəkdə, Neuralink-in fikrincə, insanlar klaviatura kimi vasitəçiləri kənara qoyaraq böyük dil modelləri ilə birbaşa ünsiyyət qura biləcəklər. İmplant sahibi insan məsələn, cavabları süni intellektdən naqilsiz qulaqlıqlar vasitəsilə ala biləcək. Neuralink bu sahədəki klinik sınaqların ilkin qrafikindən bir qədər geri qalır, çünki şirkətin rəhbəri iyul ayında bildirmişdi ki, düşüncənin mətinə çevrilməsi üzrə sınaqlara startap sentyabrın sonunadək başlayacaq. Gələcəkdə Neuralink qismən görmə qabiliyyətini bərpa etməyə və Parkinson xəstəliyini aradan qaldırmağa imkan verəcək implantlar hazırlamağı planlaşdırır. Elon Musk isə bir dəfə hətta özü üçün implant quraşdırmaq istəyi olduğunu dilə gətirmişdi.