Elon Musk-ın beyin interfeysi texnologiyalarının hazırlanması ilə məşğul olan Neuralink şirkəti öz beyin implantının insanlar üzərində testlərinə başlamaq üçün ABŞ-ın Qida və Dərman Məhsullarının Keyfiyyətlərinə Nəzarət İdarəsinə (FDA) icazə sorğusunu hələ 2022-ci ilin əvvəlində göndərmişdi. Lakin Reuters saytının verdiyi məlumata əsasən FDA Neuralink-ə müvafiq icazənin verilməsindən imtina edib. Məlumatda qeyd edilib ki, FDA Neuralink-in icazəni almadan öncə ona həll etməli olduğu problemləri təyin edib. Nizamlayıcı orqanın əsas narahatlıqları arasında şirkətin beyin implantının batareyası, implant naqillərinin beyinin digər sahələrinə daxil olma ehtimalı, implantın beyindən təhlükəsiz şəkildə çıxarılması məsələsi var.

    Beləliklə FDA-nın qərarına əsasən Neuralink müvafiq icazəni almazdan öncə ilk növbədə bu problemləri həll etməlidir. Məlumatda qeyd edilib ki, şirkət öz növbəsində beyin implantındakı olan mövcud problemlərin aradan qaldırılması üzərində çalışır. Qeyd etmək lazımdır ki, FDA-nın icazəni təqdim etməməsi o demək deyil ki, Neuralink ümumiyyətlə insanlar üzərində testlərə başlaya bilməyəcək. Şirkət mövcud problemləri aradan qaldırandan sonra yenidən FDA-ya sorğu göndərə bilər. Lakin Reuters saytının mənbələrinin fikirlərinə əsasən bu, yaxın gələcəkdə baş tutmayacaq. Elon Musk keçən ilin noyabr ayında güman edirdi ki, Neuralink-in beyin implantının insanlar üzərində testlərinə yarım ildən sonra start veriləcək. Lakin görünür, bu məsələdə bir xeyli gözləmək lazım gələcək.

Bənzər xəbər

Yeni neyron şəbəkəsi istifadəçinin mətn sorğusu əsasında müxtəlif təsvirlər yaratmağı öyrənib