OpenAI prezidenti: "Bütün insanlar üçün ümumilikdə 10 milyard süni intellekt sürətləndiricisi lazım olacaq"

     Hazırda OpenAI yalnız maliyyə resurslarını cəlb etmək üçün deyil, həm də hesablama sürətləndiricilərinin təchizatçıları ilə müqavilələr bağlamaq üçün hər fürsətdən istifadə edir, bunlara NVIDIA da daxildir. Şirkətin prezidenti Greg Brockman əmindir ki, bəşəriyyətə 10 milyardadək hesablama sürətləndiricisi lazım olacaq və planetin hər bir sakininə sözün əsl mənasında ayrıca bir süni intellekt çipi xidmət göstərəcək. Öz fikirlərini OpenAI prezidenti CNBC-yə verdiyi müsahibəsində bölüşüb. Müsahibədə həmçinin şirkətin baş direktoru Sam Altman, eləcə də NVIDIA-nın rəhbəri və təsisçisi Jensen Huang iştirak ediblər. Altman-ın fikrincə, NVIDIA ilə əməkdaşlığın miqyası əhəmiyyətinə görə insanlıq üçün ötən əsrdə NASA-nın amerikalı astronavtları Aya çatdırma proqramından da vacib olacaq.

 

     Altman insanlığın gələcəyini süni intellektlə yaradılmış və insanların gündəlik həyatına fəal təsir edən “superbeyin”in ayrılmaz iştirakı ilə görür. Brockman isə hesab edir ki, süni intellekt siz yatarkən belə qabaqlayıcı işləyən agent rolunu oynayacaq. Onun fikrincə, Yer üzündə işləyən hər bir insan öz vəzifə öhdəliklərini yerinə yetirərkən azı bir hesablama sürətləndiricisinin resurslarından istifadə edəcək. “Əslində siz istəyəcəksiniz ki, hər bir insanın özünəməxsus ayrıca GPU-su olsun” - deyə Brockman öz proqnozunu xarakterizə edib. Hazırda bu cür proqnoz qeyri-real görünə bilər, amma xatırlatmaq kifayətdir ki, ötən əsrin 90-cı illərinin əvvəlində Microsoft-un təsisçilərindən biri Bill Gates hər evdə deyil, həm də hər iş masasının üstündə mütləq kompüter olacağının qaçılmaz olduğunu vurğulamışdı.

     Bir mənada onun proqnozu gerçəkləşdi, hətta klassik formada kompüterlərdən deyil, cibə yerləşən smartfonlardan söhbət getsə belə. Brockman hesab edir ki, hazırda süni intellekt sənayesi hesablama gücünə olan potensial tələbatdan 3 pillə geri qalır və daimi fəaliyyət göstərən qlobal süni intellekt sistemini yaratmaq üçün bəşəriyyətin 10 milyardadək hesablama sürətləndiricisinə ehtiyacı ola bilər. Əslində bu, Yer üzündə yaşayan insanların sayından (8.2 milyard nəfər) da çoxdur. Brockman-ın fikrincə, dünya elə bir mərhələyə doğru gedir ki, burada iqtisadiyyatın dayaq nöqtəsi hesablama gücü olacaq. Hazırda hesablama resursları çatışmır və gələcəkdə kifayət qədər güclü məlumat emalı mərkəzlərinin mövcudluğu bütöv ölkələrin iqtisadi gücünü müəyyənləşdirəcək. Bir mənada onlar iqtisadi inkişaf üçün resurs mənbəyi kimi valyutanı əvəz edəcəklər.