Samsung şirkəti Galaxy A11 adlı yeni büdcəli smartfon modelini təqdim etdi

    Heç bir anons və təqdimat tədbiri baş tutmadan Samsung şirkətinin rəsmi saytında Galaxy A11 adlı yeni büdcəli smartfon modeli ortaya çıxdı. Əvvəlki modeldən fərqli olaraq Galaxy A11 bir sıra yeniliklər əldə edib. Təqdim edilmiş yeni Galaxy A11-in özəllikləri sırasında minimal çərçivələrə sahib böyük ekran, üçlü arxa kamera, barmaq izi skanı texnologiyası və böyük həcmli batareya var. Beləliklə smartfon 1560x720 piksel keyfiyyətli 6.4 düym TFT ekrana sahibdir. Ekranın yuxarı sol hissəsində isə ön kamera üçün nəzərdə tutulmuş çıxıntı yerləşdirilib.

    Əsas texniki göstəricilərə gəldikdə isə Galaxy A11 modeli 1.8 GHz tezlikdə çalışan 8 nüvəli prosessor (prosessorun modeli bilinmir), 2/3 GB RAM, 32 GB daxili yaddaş həcmi (512 GB-a kimi microSD dəstəkli), 13 MP (f/1.8 diafraqmalı) + 5 MP (f/2.2 diafraqmalı ultragenişbucaqlı modul) + 2 MP (f/2.4 diafraqmalı) üçlü arxa kamera, 8 MP-lik (f/2.0 diafraqamlı) ön kamera və 15 vatt gücündə sürətli şarj texnologiyalı 4000 mAh enerji tutumlu batareya ilə təchiz olunub. Barmaq izi skanı texnologiyası smartfonun arxa panelində yerləşir. Samsung şirkəti Galaxy A11-in nə zaman və hansı qiymətdə satışa çıxacağı barəsində məlumat verməyib. Lakin heç şübhəsiz smartfon orta qiymət seqmentində satışa çıxacaq və onun satış startı yaxın müddətdə başlayacaq.