Silikon Vadisinin milyonerləri qocalmaya qarşı mübarizə aparırlar

Bu barədə Wired saytı xəbər verib. Lakin ölümsüzlüyə inanan adi insanlardan fərqli olaraq Silikon Vadisinin nümayəndələri öz planlarının reallaşdırılması üçün külli miqdarda vəsait və resurslara sahibdirlər. Məhz buna görə Wired saytı düşünür ki, həmin milyonerlərin öz üzərlərində uğurlu təcrübələr aparandan sonra qocalığa qarşı ilk uğurlu texnologiyalar məhz Silikon Vadisi nümayəndələri tərəfindən ixtira olunacaq. İnsan genomunun hack olunması ilə qocalığın dayandırılmasına inanan şəxslərin Silikon Vadisində sayları getdikcə artır.

Məsələn, Y Combinator vençur fondunun partnyoru olan Daniel Gross sosial şəbəkələrdə bu barədə mütəmadi olaraq paylaşımlar edir və digərlərini də bunu etməyə səsləyir. İxtiraçı Ray Kurzweil gün ərzində çoxlu miqdarda müxtəlif dərmanlar atır ki, 2045-ci ildə baş verməsi güman olunan sinqulyarlıq hadisəsinin şahidi olsun. İnvestor Peter Thiel isə cavan qan üsuluna inanır. Söhbət 16-25 yaş arası şəxslərin qanlarının digər insanlara köçürülməsindən gedir. Bu ideya heç də yeni olmasa da, 2013-cü ildə dərc olunmuş bir sıra məlumatlarda bildirilmişdi ki, cavan siçanların qanlarında olan zülallar yaşca daha böyük olan siçanları müəyyən səviyyədə güclü etmişdilər.

Bu cür tədqiqatdan sonra insanların bu sahədə həvəsləri daha da artmışdır. Günümüzdə “Ambrosia” adlı şirkət 8000$-a cavan insanların qanlarının köçürülməsi kursunu təklif edir. Qocalığın əsas problemi ondan ibarətdir ki, o, mübarizə aparılacaq bir xəstəlik deyil. Ümumdünya Səhiyyə Təşkilatı üçün qocalıq norma hesab olunur. Bu cür tədqiqatlarda lazımi maliyyələşdirmənin olmaması da öz təsirini göstərir. Bu cür şəraitdə bizdə işlək üsulun olmamasını düşünmək tamamilə məntiqlidir. Hətta elmi innovasiyalar və yeni dərmanların olması halında da təcrübələrin aparılması üçün lazımi vəsait yoxdur.

Vəziyyətin dəyişilməsi üçün bu sahədə heç olmasa bir dənə nəzərə çarpan uğur olmalıdır. 20 il bundan öncə alim Cynthia Kenyon aşkar etmişdi ki, genlərdən birində olan mutasiya dairəvi soxulcanlara iki dəfə çox yaşamağa imkan verir. Bu cür hadisəni insanlar üçün də gözləyirlər. Lakin əvvəllər bu cür uğurun hardansa gələcəyini gözləmək lazım gəlirdisə (maliyyəsiz və resurslarsız bu cür uğuru əldə etmək qeyri mümkündür), indiki zamanda Silikon Vadisi var. Belə ki, Silikon Vadisinin milyonerləri nəinki bu cür tədqiqatlara milyonlarla dollar xərcləyirlər, həmdə özləri təcrübi siçanlar rolunda çıxış edirlər. Wired saytının fikrincə məhz Silikon Vadisində insan həyatının uzadılması üçün nəzərdə tutulmuş innovasiyalı texnologiyaları ixtira edəcəklər.