Snapdragon 8 Gen Elite prosessorunun imkanları açıqlanıb

     Digital Chat Station ləqəbli məşhur insayder, Qualcomm şirkətinin 2025-ci ilin ikinci yarısında təqdim etməsi gözlənilən Snapdragon 8 Gen Elite 2 adlı flaqman mobil prosessorunun xüsusiyyətlərini açıqlayıb. Snapdragon 8 Gen Elite 2, TSMC-nin üçüncü nəsil təkmilləşdirilmiş 3 nanometrlik texnoloji prosesi əsasında istehsal olunacaq və yenilənmiş Adreno 8401 qrafik çipinə, həmçinin 100 TOPS-dan artıq məhsuldarlığa malik neyron çipinə (NPU) sahib olacaq. Bu, mövcud Snapdragon X Elite prosessorunun (45 TOPS) ikiqat gücündədir.

     Prosessor 8 nüvəli olacaq və nüvələr onun tərkibində “2 + 6” konfiqurasiyasında yerləşəcəklər. Yəni 2 ədəd yüksək performanslı Pegasus nüvəsi və 6 ədəd enerji effektivliyi nüvəsi. Pegasus nüvələri 5 GHz-ə qədər sürətlənə bilir. Prosessorun keş yaddaşı 32 MB-a qədər artırılacaq və AnTuTu testində mövcud flaqmanlarla müqayisədə performans artımı 40.7% səviyyəsində gözlənilir. Bu prosessor görüntü emalı və səsli əmrlərin daha yüksək səmərəliliklə emalı da daxil olmaqla, genişləndirilmiş süni zəka imkanlarına istiqamətlənəcək. Snapdragon 8 Gen Elite 2 ilə təchiz edilmiş ilk smartfonlar 2025-ci ilin oktyabrında satışa çıxa bilər və çox güman ki, bu prosessoru öz cihazlarında ilk tətbiq edəcək şirkət Xiaomi olacaq.

Mənbə: Wccftech