SpaceX birjaya çıxır: Əsas risk faktoru Elon Musk ola bilər

    Technote.az “The Verge” platformasına istinadən bildirir ki, SpaceX rəsmi olaraq IPO sənədlərini təqdim edib. Bu addım təkcə tarixi birja çıxışı kimi deyil, həm də Musk-a məxsus şirkətlər arasındakı sıx maliyyə əlaqələrini ortaya qoyduğu üçün diqqət çəkir.

     330 səhifəlik S-1 sənədində Tesla, xAI, X, The Boring Company və Neuralink dəfələrlə xatırlanır. Bu isə Musk imperiyasındakı bizneslərin bir-biri ilə nə qədər bağlı olduğunu göstərir.

    Sənədlərə əsasən, Tesla hazırda SpaceX-in A sinif səhmlərinin təxminən 19 milyonuna sahibdir. Bu, ümumi səhmlərin 1 faizindən az olsa da, şirkətlər arasındakı ortaq maraqları nümayiş etdirir. Bundan başqa, Tesla-nın xAI-dakı payı fevral ayında xAI ilə SpaceX-in birləşməsindən sonra SpaceX səhmlərinə çevrilib.

    SpaceX həmçinin Tesla-dan 131 milyon dollar dəyərində Tesla Cybertruck alıb. Şirkətin məlumat mərkəzlərinin enerji sabitliyi üçün isə 2024 və 2025-ci illərdə Tesla-dan 697 milyon dollarlıq Tesla Megapack alınması qeyd olunub.

    Digər tərəfdən, The Boring Company SpaceX-ə ofis icarəsi üçün təxminən 1,2 milyon dollar ödəyib. SpaceX isə Texasdakı qərargahında tunel qazılması üçün bu şirkətə əlavə 1 milyon dollar xərcləyib.

    IPO sənədlərində SpaceX açıq şəkildə bildirir ki, şirkət Elon Musk-ın liderliyindən “yüksək dərəcədə asılıdır”. Eyni zamanda vurğulanır ki, Musk-ın digər şirkətləri gələcəkdə SpaceX ilə rəqabət apara və ya maraq toqquşması yarada bilər.

    Sənəddə qeyd olunur ki, Musk-ın biznes qərarları, ictimai açıqlamaları və digər layihələrdəki fəaliyyəti SpaceX-in maliyyə vəziyyətinə, tənzimləyicilərlə münasibətlərinə və səhmlərinin qiymətinə həm müsbət, həm də mənfi təsir göstərə bilər.

    Analitiklər hesab edir ki, SpaceX üçün Elon Musk həm ən böyük üstünlük, həm də ən ciddi risk mənbəyidir. Şirkətin uğuru böyük ölçüdə onun vizyonuna bağlı olsa da, digər layihələrdəki qərarları və reputasiya riskləri investorlar üçün narahatlıq yaradır.