Dünən SpaceX şirkəti özünün Starlink layihəsi çərçivəsində internet peyklərindən ibarət ikinci partiyanı Falcon 9 raketi vasitəsilə uğurlu şəkildə Yer kürəsinin orbitinə göndərdi. Göndərilmiş yeni internet peykləri həm Ku həm də Ka diapazonunda olan şəbəkəni təmin edir. Bu isə internetin əhatə dairəsini genişləndirir. Bundan əlavə olaraq peyklər elə komponentlərdən ibarətdirlər ki, onlar sıradan çıxandan sonra atmosferdə yanacaqlar. Bu barədə Vc.ru saytı xəbər verib. Bu dəfəki uçuş missiyasında istifadə edilmiş faydalı yükün kütləsi rekord göstəricidə (15.6 ton) olub.

    Qeyd etmək lazımdır ki, Falcon 9 raketi Yer kürəsinin aşağı orbitinə 22.8 ton, geokeçid orbitinə isə 8.3 ton yük daşıya bilir. Baş tutmuş yeni uçuş missiyasında şirkət ilk dəfə olaraq Falcon 9-un daha öncə 3 dəfə uçuş missiyasında iştirak etmiş birinci raket pilləsindən istifadə edib. Yəni şirkət eyni raket pilləsini dördüncü dəfə istifadə edib. Nəticədə Falcon 9-un dördüncü dəfə istifadə edilmiş birinci pilləsi uğurlu şəkildə eniş platformasına enib. Bundan əlavə olaraq şirkət həmçinin raketin üst pilləsini də təkrar olaraq istifadə edib. Daha öncə həmin üst pillə bir dəfə kosmosa göndərilmişdi.

    Raketin üst pilləsi atmosferdə uçuş mərhələsi zamanı faydalı yükü qoruyur. Daha sonra isə həmin hissə tamamilə ayrılır. Qeyd etmək lazımdır ki, Starlink layihəsi çərçivəsində 60 peykdən ibarət ilk partiyanı şirkət hələ bu ilin may ayında Yer kürəsinin orbitinə göndərmişdi. Layihənin əsas məqsədi isə uzaq regionlar da daxil olmaqla Yer kürəsi üzrə hamıya yüksək sürətli internet şəbəkəsini təqdim etməkdir. Şirkət artıq 12000 peykin Yer kürəsinin orbitində yerləşdirilmə icazəsini alıb və əlavə olaraq 30000 peykin yerləşdirilməsi üçün də icazə sorğusu göndərib. Şirkət öz intenert xidmətini ilk müştərilərə atıq gələn ilin ortasında verməyi planlaşdırır.