SpaceX, Tesla və xAI şirkətləri birləşə bilər

     Technote.az “TechCrunch” platformasına istinadən bildirir ki, Elon Musk-ın rəhbərlik etdiyi SpaceX, Tesla və xAI şirkətləri mümkün birləşmə ilə bağlı ilkin mərhələdə danışıqlar aparır. Bloomberg və Reuters-in məlumatına görə, müzakirələr hələ erkən mərhələdə olsa da, nəticədə şirkətlərdən ən az birinin SpaceX-in tərkibinə daxil edilməsi ehtimal olunur.

    Mənbələrə əsasən, hazırda iki əsas ssenari müzakirə edilir. Birinci ssenaridə SpaceX və Tesla-nın birləşməsi nəzərdən keçirilir. İkinci variantda isə SpaceX-in xAI ilə birləşməsi gündəmdədir. Qeyd edək ki, xAI artıq Elon Musk-ın sahibi olduğu X sosial media platformasını da özündə birləşdirir.

     Reuters-in yazdığına görə, SpaceX və xAI arasında mümkün birləşmə SpaceX-in bu il planlaşdırılan IPO-su öncəsi baş tuta bilər. Bu halda Grok çatbotu, X platforması, Starlink peykləri və SpaceX raketləri vahid korporativ struktur altında fəaliyyət göstərə bilər.

    Hələlik SpaceX və xAI nümayəndələri bu ehtimal barədə ictimai açıqlama verməyiblər.