Elon Musk özünün X platformasındakı hesabında Starship kosmik gəmisinin yeni fotolarını təqdim edib. Fotolarda əks olunmuş Starship Texas ştatındakı Boka-Çika kosmodromunda yerləşir. O, ikinci orbital uçuş cəhdini reallaşdırmağa hazırdır. Qeyd etmək lazımdır ki, Starship-in ilk kosmik uçuş cəhdi 20 aprel tarixində reallaşdırılmışdı. 120 metrlik kosmik gəmi həmin uçuş cəhdi çərçivəsində 38 km yüksəkliyə qalxmış və daha sonra idarə olunmayan manevrlər reallaşdırmışdı.

    İdarə olunmayan manevrlər səbəbilə kosmik gəmiyə partlayış əmri göndərilmişdi. Hələ iyun ayında Musk bildirmişdi ki, Starship-in ilk orbital uçuşunun növbəti cəhdi daha uğurlu alınmalıdır. O, kosmik gəminin ilk orbital uçuşu uğurlu şəkildə reallaşdırmaq ehtimalını 60% qiymətləndirir. Starship-in ilk orbital uçuşunun növbəti cəhdinin reallaşdırılması üçün SpaceX hal hazırda ABŞ-ın müvafiq orqanından icazəni gözləyir.