Sugon-un yaddaş sistemləri əsas siyahıdan çıxarıldı, Aurora lider oldu

    IO500 komitəsi Çinin sanksiyalara məruz qalmış “Sugon” şirkətinin yalnız fleş yaddaşdan ibarət “ParaStor F9000” sistemlərini “Production” siyahısından çıxarıb. Buna səbəb sistemin quruluşu barədə kifayət qədər açıq məlumatın olmaması və fayl sisteminin geniş istifadəyə verilməməsidir. Sistemlər “Research” siyahısına keçirilsə də, ən sürətli yaddaş həlləri sırasında qalıb. “Intel” prosessorları ilə işləyən “Aurora” isə əsas və 10 müştərili reytinqlərdə yenidən lider olub.

    IO500 superkompüterlərin hesablama gücünü deyil, məlumat saxlama sistemlərinin sürətini ölçür. Qiymətləndirmə zamanı məlumat ötürmə sürəti, eləcə də saniyədə yerinə yetirilən giriş və çıxış əməliyyatlarının sayı nəzərə alınır. “Production” siyahısına daxil olmaq üçün sistemin quruluşu ətraflı sənədləşdirilməli, fayl sistemi əlçatan olmalı və nəticələri müstəqil şəkildə yoxlamaq mümkün olmalıdır.

    ISC 2026 tədbirində təqdim edilən daha böyük “SCNet AICS-A” sistemi 500 müştəri qovşağı və 64 000 müştəri prosessoru ilə sınaqdan keçirilib. Onun IO500 balı 79 110,05 olub. Məlumat ötürmə sürəti 26 888,39 GiB/s, metadata göstəricisi isə 232 754,76 kIOPS təşkil edib. kIOPS saniyədə minlərlə əməliyyatın yerinə yetirildiyini göstərir. Metadata göstəricisi isə fayl adları və qovluqlar kimi məlumatların nə qədər sürətlə emal olunduğunu bildirir.

    Daha kiçik “AICS-B” sistemi 10 müştəri və 2560 müştəri prosessoru ilə sınaqdan keçirilib. Sistem 7839,30 bal toplayıb. Onun məlumat ötürmə sürəti 2551,40 GiB/s, metadata nəticəsi isə 24 086,69 kIOPS olub. Hər 2 təqdimatda yaddaş avadanlığının istehsalçısı “Sugon”, fayl sistemi isə “ParaStor” kimi göstərilib.

    Bu nəticələr Arqonn Milli Laboratoriyasının “Aurora” sisteminin göstəricilərini xeyli üstələyib. “Aurora”da “Intel Optane Persistent Memory” modulları, SSD yaddaş qurğuları və “DAOS” fayl sistemi işlədilir. Sistem 32 165,90 bal, 10 066,09 GiB/s məlumat ötürmə sürəti və 102 785,41 kIOPS metadata nəticəsi göstərib. “Aurora”nın 10 müştəri ilə sınaq nəticəsi isə 2885,57 bal olub. Beləliklə, böyük “SCNet” sistemi ümumi hesabda 2,46 dəfə, kiçik sistem isə 2,72 dəfə daha sürətli çıxıb.

    “Aurora”nın siyahıya qaytarılmasında “DAOS” fayl sisteminin açıq mənbəli olması rol oynayıb. Proqramı yükləmək mümkündür. Onun quruluşu və avadanlıq tələbləri də açıq şəkildə sənədləşdirilib. “ParaStor” isə qapalı sistemdir. Məhdud əlçatanlıq nəticələrin müstəqil yoxlanmasını çətinləşdirir.

    “Research” siyahısının lideri “Huawei OceanStor A800” yaddaşı və “OceanFS” fayl sistemi ilə işləyən “CloudBrain” sistemidir. Sistem 603 334,56 bal toplayıb. Onun ardıcıl məlumat ötürmə nəticəsi 8291,11 GiB/s, təsadüfi əməliyyat göstəricisi isə 43 903 983,64 kIOPS olub.