Ticarət müharibəsi Tesla Optimus robotlarının istehsalına mane ola bilər

     Tesla-nın rüblük hesabat tədbirində şirkətin rəhbəri Elon Musk ixrac məhdudiyyətləri mövzusuna toxunub. ABŞ-da tətbiq olunan idxal rüsumlarının Tesla-nın biznesinə təsirini rəqiblərlə müqayisədə minimal qiymətləndirən Musk, Çin tərəfindən qoyulan ixrac məhdudiyyətlərini Optimus adlı insanabənzər robotların istehsalını təşkil etmək üçün ciddi maneə adlandırıb. İndiyə qədər bu robotların seriyalı istehsalının Tesla-nın baş ofisinin yaxınlığında, Texasdakı əsas müəssisədə qurulacağı hesab olunurdu. Lakin bu həftə məlum olub ki, Optimus robotlarının ilkin sınaq istehsalı əvvəlcə Kaliforniyada həyata keçiriləcək. Musk-ın sözlərinə görə, Çin tərəfindən nadir torpaq elementlərinin ixracına qoyulan məhdudiyyətlər Tesla-nın robotların istehsalında istifadə olunan maqnitlərin hazırlanmasında çətinlik yaradır.

     Şirkət bu məsələ ilə bağlı Çin hakimiyyəti ilə danışıqlara başlayıb və nadir torpaq elementlərini almaq üçün ixrac lisenziyası əldə etməyə ümid edir. Bunun üçün isə sübut edilməlidir ki, son məhsullar hərbi məqsədlərdə istifadə olunmayacaq. Çin bu ay ABŞ-ın Çin məhsullarına idxal rüsumlarını artırmasına cavab tədbirlərindən biri olaraq bu cür məhdudiyyətləri tətbiq edib. Elon Musk bildirib: “Çin bəzi zəmanətlərin təqdim olunmasını tələb edir, bu zəmanətlər də nəzərdə tutur ki, həmin metallar hərbi məqsədlərdə istifadə olunmayacaq - halbuki bu onsuz da aydındır. Onlar sadəcə insanabənzər robotlarda istifadə olunacaq”. O həmçinin vurğulayıb ki, Tesla-nın gələcəyi əsasən avtonom elektromobillər və robotlardan asılı olacaq.

     “Şirkətin gələcəyi genişmiqyaslı avtonom nəqliyyat vasitələri parkına və böyük həcmdə istehsal olunacaq insanabənzər avtonom robotlara əsaslanır”. Musk daha əvvəl bildirmişdi ki, Tesla bu ilin sonuna qədər təxminən 5000 Optimus robotu istehsal etməyi planlaşdırır. Şirkət bu robotları ilk növbədə öz elektromobil yığma zavodlarında tətbiq etməyi nəzərdə tutur. Çin tərəfindən tətbiq olunan ixrac məhdudiyyətlərinə baxmayaraq, şirkət hələ də inanır ki, bu il bir neçə min robot istehsal edə və onları öz müəssisələrində istifadə edə biləcək.

Mənbə: CNBC

Bənzər xəbərlər

Elm & Texnologiya

5 dəqiqəyə 520 km məsafəyə yetəcək qədər enerji yığan elektromobil batareyası təqdim edilib

Çinin CATL şirkəti elektrikli və hibrid nəqliyyat vasitələri üçün batareyaların ən böyük istehsalçısı olaraq qalır və bu ilin ilk 2 ayının nəticələrinə görə o, dünya bazarının 38.2%-nə sahibdir.

Elm & Texnologiya

İldırımötürücü özəlliyə sahib ilk dron hazırlanıb

Yaponiya şirkəti NTT dünyada ilk dəfə ildırımötürücü qəfəs ilə təchiz olunmuş dron vasitəsilə ildırım zərbəsi yaradıb. Bu yenilik şəhər infrastrukturlarının qorunması üçün istifadə edilə bilər - cihaz göy gurultulu hava şəraitində havaya qalxaraq ildırım boşalmasını özünə çəkəcək və yerə dəyə biləcək zərərlərin qarşısını alacaq.

Elm & Texnologiya

Xüsusi implant vasitəsilə beyin dalğalarını təbii nitqə çevirmək mümkün olacaq

Xeyli sayda insan xəstəliklər nəticəsində nitq qabiliyyətini itirir, baxmayaraq ki, onların idrak funksiyaları toxunulmaz qalır. Buna görə də süni zəka sahəsindəki irəliləyişlər fonunda bir çox tədqiqatçılar beynə implantasiya edilən çiplərlə neyron şəbəkələrin birləşməsi yolu ilə təbii nitqin sintezinə fokuslanıblar.

Elm & Texnologiya

Aydakı potensial bazanın inşasında robotlar iştirak edəcəklər

NASA və HEBI Robotics şirkəti qüvvələrini birləşdirərək Ayda bazalar inşa edəcək robotlar hazırlayırlar. Bu prosesin artıq 2030-cu ilə qədər gerçəkləşməsi planlaşdırılır. Robotlar insan müdaxiləsi olmadan işləyə biləcəklər.

Elm & Texnologiya

Huawei dünyanın ilk 10 Gbit sürətli internetini istifadəyə verib

Çində ilk dəfə olaraq bir şəhər təxminən 10 000 Mbit/s sürətində olan genişzolaqlı internetə keçid edib. Bu uğura paytaxt Pekinin ətrafında yerləşən Syun’an adlı yaşayış məntəqəsi nail olub.