Unitree yeni 4 ayaqlı robotunun unikal imkanlarını sərgiləyib (VİDEO)

     Unitree Robotics, yeni A2 Stellar Explorer adlı 4 ayaqlı robotun çətin relyefli ərazidə hərəkət qabiliyyətini nümayiş etdirən bir video təqdim edib. 4 ayaqlı robot çevikliyi və dözümlülüyü ilə seçilərək, belində yük daşıdığı halda belə dik yamaclara qalxmaq və enmək bacarığını göstərib. Onun “Ulduz tədqiqatçısı” (Stellar Explorer) adlandırılması təsadüfi deyil - bu robot mürəkkəb ərazidə irəliləməyə və dayaz su maneələrini aşaraq naməlum yerləri tədqiq etməyə hazırdır. Videoda robot əsasən 4 ayaq üzərində hərəkət edir. Təkərli konfiqurasiyada isə saatda 18 km-ə qədər sürətə çata bilir. Lakin təkərlə hərəkət imkanları məhduddur - buna qarşılıq, təkərlərsiz 45 dərəcə bucaqlı yamaca qalxa və təxminən 11 kq-lıq yükü belində daşıya bilir.

     Robotun hazırlanmasında istifadə olunmuş mühəndislik plastikləri və alüminium ərintisi, onun statik vəziyyətdə böyüklər üçün nəzərdə tutulmuş 100 kq-dək çəkini daşımasına imkan verir. Robotun enerji ilə təminatı çıxarıla bilən batareyalar vasitəsilə həyata keçirilir. Standart batareyanın tutumu 9000 mAh təşkil edir və lazım gəldikdə 2 belə batareya bloku quraşdırmaq mümkündür. Bu konfiqurasiyada robot 4 ayaqla hərəkət edərək belində 30 kq-lıq yük daşımaqla 3 saat ərzində 13 km məsafə qət edib. Ayaqların istifadəsi robota 30 sm hündürlüyündə maneələri aşmağa imkan verir - bu isə pilləkənləri sərbəst şəkildə qalxmaq və enmək üçün kifayətdir.

     Bundan əlavə, robot daha hündür pillələri də aşa bilir - arxa ayaqları üzərində qalxaraq, ön ayaqları ilə tutunmaqla 1 metrə qədər hündürlükdəki maneələrə dırmaşa bilir. İstehsalçının verdiyi məlumata görə, robotun suya və toza qarşı dözümlülüyü IP56 standartına uyğundur, bu isə onun su şırnağına davamlı olduğunu və güclü yağış altında belə zərər görməyəcəyini göstərir. Lakin robotun tamamilə suya batırılması ehtimal ki, yolverilməzdir və nasazlığa səbəb ola bilər - baxmayaraq ki, o, su üzərində cəld hərəkət edə bilir və bu ona ziyan vurmur. Yeni modelin qiyməti və satış tarixi hələlik müəyyən edilməyib. Ancaq Unitree Robotics şirkəti robotlarının qiymətini bazar səviyyəsindən yuxarı təyin etməmə prinsipinə sadiq qalır, buna görə də qiymət baxımından xoşagəlməz sürprizlərin olacağı gözlənilmir.