Vyetnamda 10 000-dən çox dronun iştirakı ilə yeni rekorda imza atılıb (VİDEO)

     Aprel ayında Ginnesin Rekordlar Kitabına dronların iştirakı ilə yeni bir nailiyyət əlavə olundu. Vyetnam üzərində səmaya 10 518 dron qaldırıldı. Bu, dünyanın ən irimiqyaslı işıq şousu idi. Bundan əvvəlki rekord 2024-cü ildə Şençjendə keçirilmiş və 10 197 dronun iştirak etdiyi şouya məxsus idi. Hər iki çıxışın arxasında eyni şirkət - Çin şirkəti Damoda dayanır. Şirkət dronların bədii uçuş texnikasını getdikcə təkmilləşdirir və ondan yeni rekordlar gözləmək tamamilə mümkündür. Vyetnamdakı şou Cənubun Azadlığı və Milli Birləşmənin 50 illiyinə (30 aprel 1975-ci il) həsr olunmuşdu.

     Tədbirin maliyyələşdirilməsini yerli Prowtech International Vina şirkəti xarici tərəfdaşlarla birlikdə təmin etmişdi. Texniki həyata keçirməni isə bu sahədə real rəqibi olmayan Çin şirkəti Damoda öz üzərinə götürmüşdü. Bu isə bir qədər qəribə görünür, çünki dronların sürü ilə idarə olunması müasir robot texnologiyalarının zirvəsi sayılır. Belə şirkətlərin inkişaf etmiş ölkələrdə çox olması gözlənilsə də, ictimaiyyət qarşısında demək olar ki, görünmürlər. Saigon Riverside Park üzərindəki səmada dronlar işıq naxışları və ölkənin həyatından, tarixindən səhnələr canlandırırdılar. Hər şey yaxşı gedirdi, lakin əsas şou ləğv edildi. Ginnesin Rekordlar Kitabına daxil edilən nailiyyət 28 aprel tarixində keçirilmiş baş məşq zamanı qeydə alınıb.

     Şounun ləğvi səbəbi dəqiq açıqlanmayıb, lakin ehtimal olunur ki, bu, şouda reklam fraqmentlərinin yer alması ilə bağlıdır. Bir anda dronlar səmada reklam görüntüləri formalaşdırıblar. Bu səhnələri ümumi çıxışın məntiqini pozmadan çıxarmaq mümkün olmayıb. Çünki onlar 10 500-dən çox aparatı əhatə edən vahid xoreoqrafik kompozisiyanın bir hissəsi olublar. Şounun bütövlükdə strukturu uçuşdan enişə qədər fasiləsiz hərəkətdən ibarətdir və bir neçə gün ərzində bu strukturda dəyişiklik etmək texniki cəhətdən mümkün olmayıb. Bu isə onu göstərir ki, müasir dron sürü idarəetmə sistemləri hələ kifayət qədər çevik deyil. Bununla belə, bu çətinliklər müvəqqətidir.

Mənbə: Interesting Engineering