X-Bow Systems ABŞ Ordusu üçün 3D çapla raket mühərrikləri hazırlayacaq

    “X-Bow Systems” ABŞ Ordusunun LCCM layihəsi üçün 3D çapla bərk yanacaqlı raket mühərrikləri hazırlayacaq. Şirkət bunun üçün “Leidos” ilə müqavilə bağlayıb. Layihəyə ucuz konteyner tipli sursatların və qanadlı raket sürətləndiricilərinin hazırlanması daxildir.

    LCCM ABŞ Müharibə Nazirliyinin “Arsenal of Freedom” təşəbbüsündəki layihələrdən biridir. Proqramın məqsədi ölkənin müdafiə sənayesində istehsalı yenidən gücləndirməkdir. 2016-cı ildə yaradılan “X-Bow Systems” indiyədək 2100-dən çox döyüşə hazır raket mühərriki istehsal edib.

    3D çap mürəkkəb quruluşlu bərk yanacaqlı raket mühərriklərinin hazırlanmasını asanlaşdırır. Bu üsulla mühərrikin quruluşunu dəyişmək və sınaq üçün yeni nümunə hazırlamaq daha az vaxt aparır. Şirkətin məlumatına görə, yeni mühərrik modellərini bir neçə günə hazırlamaq olur. Ənənəvi müdafiə istehsalında eyni proses aylarla, bəzən illərlə çəkə bilər.

    Başqa istehsalçılar da raket texnologiyalarında 3D çapı sınaqdan keçirirlər. “Chromatic 3D Materials” bu ilin əvvəlində 3D çapla hazırlanan raket yanacağını yerində işlədərək sınaqdan keçirib və prosesi uğurla başa vurub. Hindistanın “Othisis” startapı avqustda çox aşağı temperaturda saxlanılan yanacaqla işləyən kriogen raket mühərrikini göstərib. Həvəskar istifadəçi hətta 100 dollardan (təxminən 170 manat) az pul xərcləyərək daşınan zenit raket sistemi hazırlayıb.

    3D çapdan yalnız raket mühərriklərində yararlanmırlar. Başqa bir startap ABŞ Hərbi Hava Qüvvələri üçün dronlara və uzaqmənzilli silahlara uyğun reaktiv mühərrik nümunələri hazırlayacaq. Şirkət bu iş üçün 30 milyon dollarlıq (təxminən 51 milyon manat) müqavilə alıb. ABŞ Hərbi Dəniz Qüvvələri də təyyarədaşıyan gəmilərdə dronlar və ehtiyat hissələri çap etməyə başlayıb.

    ABŞ Ordusunun bəzi bölmələri 3D çapla “Dragoon Bombs” adlı sursatlar hazırlayır və onları olduqları yerdə yığılmış dronlara qoşur. Bu silahlar canlı qüvvəyə və yüngül zirehli texnikaya qarşı təxminən 19 km məsafədən işlədilir. Ukraynadakı müharibə dronların və 3D çapın döyüş meydanında geniş yayılmasına səbəb olub. ABŞ və Yaponiya kimi ölkələr də daha ucuz silahlar hazırlamaq üçün bu texnologiyalarla maraqlanırlar.