Xiaomi şirkəti Korin Zero adlı bel çantasını təqdim edib. Sözügedən bel çantası daxilində çoxlu sayda cihaz yerləşə bilir və bundan əlavə olaraq o, smartfonun və digər cihazların şarj olunmaları üçün nəzərdə tutulmuş xarici USB girişə sahibdir. Lakin bu bel çantasının əsas özəlliyi ondan ibarətdir ki, o, aktiv soyutma sisteminə sahibdir və onu iki ssenaridə istifadə etmək olar. Bel çantasının daxilində böyük olmayan pər mövcuddur və onun fırlanma sürəti dəqiqədə 3500 dövr təşkil edir. Xiaomi tərəfindən hazırlanmış xüsusi konstruksiya sayəsində soyuq hava kütləsi xüsusi kanallar üzrə istifadəçinin belində bərabər şəkildə paylanır. Bu üsul ilə çanta istifadəçini isti hava şəraitində sərinlədir.

    Qeyd etmək lazımdır ki, çantanın aktiv soyutma sistemi şarj edilmiş batareya ilə işə düşür. Buna misal olaraq powerbank-ı gətirmək olar. Xiaomi həmçinin çantanı noutbuklar üçün nəzərdə tutulmuş altlıq kimi də istifadə etməyi məsləhət görür. Bu halda çantanın aktiv soyutma sistemi isti hava şəraitinə sahib qapalı və ya açıq məkanda noutbukun əlavə soyudulmasını təmin edəcək. Bu bel çantası 16 litr həcmə sahibdir və onun daxilində 15.6 düym ölçülü noutbuk rahatlıqla yerləşə bilər. Xarici tərəfdən bel çantası sudan qorunan xüsusi örtük ilə əhatə edilib. Çantanın kənar hissələrində isə işığı əks etdirən elementlər mövcuddur. Bu üsul ilə sözügedən çantanın istifadəçisini gecə vaxtı görmək mümkün olacaq. Çantanın ağırlığı 1.6 kq təşkil edir. Qeyd etmək lazımdır ki, Xiaomi Korin Zero adlı çantanı öz crowdfunding platformasında təqdim edib və alıcılar onu həmin platformada 74$-a əldə edə bilərlər.