XPeng yenilənmiş Iron robotunu təqdim edib

     Çinin XPeng şirkəti, avtomobil yığım xətlərində çalışan Iron adlı humanoid (insanabənzər) robotunun yenilənmiş versiyasını təqdim edib. Robot Turing adlı süni zəka çipi ilə təchiz olunub, 60 oynaq, 200 hərəkət azadlığı dərəcəsi və 3000 TOPS hesablama gücünə malikdir ki, bu da ona dəqiq manipulyasiyalar aparmağa, təbii şəkildə hərəkət etməyə və dialoqlar qurmağa imkan verir. XPeng-in avtonom elektrik avtomobillərindən götürülmüş texnologiyalar sayəsində Iron insan səviyyəsinə yaxın şəkildə tapşırıqlara uyğunlaşa bilir. Ötən ilin sonunda elektrik avtomobili istehsalçısı Tesla-nın yolunu izləyərək öz ilk insanabənzər robotu olan Iron-u təqdim etmişdi. Bu robot artıq şirkətin müəssisələrində işləyir və gələcək elektrik avtomobillərinin yığımında kömək edir.

     İndi isə XPeng onun yenilənmiş versiyasını ictimaiyyətə təqdim edib. Boyu 173 sm, çəkisi 70 kq olan robot insanın anatomik proporsiyalarını təkrarlayır və dəqiq manipulyasiyalar üçün 22 hərəkət azadlığına malik tam funksional əllərlə təchiz olunub. XPeng-in bildirdiyinə görə, robotun hərəkətlərinin hamarlığı və yerişinin sabitliyi gücləndirilməklə öyrənmə alqoritmləri və süni zəka modelləri vasitəsilə təmin edilir ki, bu da robotlara xas olan kəskin və mexaniki hərəkətlərin qarşısını alır. Iron-un nitq sistemi XPeng-in intellektual salon texnologiyalarını miras alıb. O, məntiqi düşünmə qabiliyyəti sayəsində təbii dialoqlar apara bilir.

     Robotun daxilində XPeng-in avtonom elektrik avtomobillərində istifadə olunan eyni süni zəka alqoritmləri yerləşdirilib. Iron-un tərkib hissəsini XPeng-in xüsusi Turing AI çipi və Tianji AIOS proqram sistemi təşkil edir. Bu iki komponent birlikdə robotun qavrama, hərəkət və qarşılıqlı əlaqə sahələrində yüksək zəka səviyyəsini təmin edir. Iron-un hesablayıcı gücü indi 3000 TOPS təşkil edir. 2024-cü ildə keçirilmiş təqdimatda şirkət bəyan etmişdi ki, Turing çipi 30 milyard parametrli süni zəka modellərini işləyə bilir və 40 gün ərzində 2700-dən çox funksional testi yerinə yetirə bilir - bu, sənaye standartlarından 3 dəfə sürətlidir. Belə performans robota tapşırıqlara uyğunlaşmaq və insan səviyyəsinə yaxın qərarlar qəbul etmək imkanı verir.

     Robotun görmə sistemi “Eagle Eye” adlanır və ətraf mühiti dəqiq qavramaq və qərar vermək üçün qabaqcıl kameralardan istifadə edir. Bu sistem həmçinin XPeng-in avtonom sürücülük texnologiyasında tətbiq olunan 720 dərəcə baxış bucağına malik süni zəka əsaslı görmə sistemi ilə təchiz olunub. XPeng Iron-u ağıllı nəqliyyat və robot texnologiyalarının bir-birini tamamladığı vahid ekosistem konsepsiyasının təcəssümü kimi təqdim edir. Şirkət bu robotun potensialını yalnız istehsalat sahəsində deyil, həm də ev, ofis və pərakəndə satış sahələrində universal köməkçi kimi görür. Bu bazarda XPeng-in rəqibi isə Tesla və onun avtonom sürücülük texnologiyalarına əsaslanan Optimus layihəsi kimi nəhənglər olacaq.

Mənbə: Interesting Engineering

Bənzər xəbərlər

Elm & Texnologiya

Hava üzərindən məlumatların ötürülməsi sürətində yeni rekorda imza atılıb

Eyndhoven Texnologiya Universitetinin (TU/e) alimləri 4.6 km məsafədə naqilsiz infraqırmızı rabitə kanalı quraraq bu vasitə ilə saniyədə 5.7 Tbit sürətlə məlumat ötürə biliblər.

Elm & Texnologiya

İllərlə istifadə edilməyən SSD-lərdə məlumatlar silinə bilər

Uzunmüddətli məlumat saxlama üçün adətən maqnit disklərə əsaslanan klassik sərt disklərdən istifadə olunur, çünki bu, sadəcə olaraq daha ucuz başa gəlir.

Elm & Texnologiya

SpaceX Falcon 9-un birinci pilləsinin təkrar istifadəsində yeni rekorda imza atıb

SpaceX Falcon 9 daşıyıcı raketinin birinci pilləsinin təkrar istifadəsində yeni rekorda imza atıb - raket 14 aprel tarixində 27-ci dəfə uçuşa göndərilərək orbitə 21 ədəd V2 Mini internet peykini çatdırıb.

Elm & Texnologiya

2030-cu ilə qədər data mərkəzləri 2 dəfə daha çox enerji sərf edəcəklər

Beynəlxalq Enerji Agentliyinin (BEA) hesabatına görə, 2030-cu ilə qədər məlumat emalı mərkəzlərinin elektrik enerjisi istehlakı 2 dəfədən çox artaraq 945 teravat-saat təşkil edəcək ki, bu da Yaponiyanın illik enerji istehlakına bərabərdir.

Elm & Texnologiya

İnsanabənzər robotlar arasında boks döyüşü anons edilib (VİDEO)

Robototexnika sahəsində fəaliyyət göstərən Unitree Robotics şirkəti sosial şəbəkə X-də “Unitree Fist King: Awakening” adlı tədbirini elan edib. Söhbət təxminən 1 ay sonra baş tutacaq boks döyüşündən gedir, burada rinqdə iki insanabənzər robot qarşı-qarşıya gələcək.