Xueba 01 adlı robot dramaturgiya üzrə aspiranturaya daxil olub

     Xueba 01 adlı antropomorf robot Çində ilk dəfə olaraq “Teatr və kino dramaturgiyası” ixtisası üzrə aspiranturaya qəbul olunub. Onu Şanxay Teatr Akademiyası qəbul edib və təhsilini başa vurduqdan sonra ona incəsənət sahəsində elmlər namizədi diplomu verməyi planlaşdırır. Çin dilində “Xueba” sözü “yuvarlaq əlaçı” və ya “kitab qurdu” mənasını verir. Bununla belə, robot hazırcavab və zarafatcıl olması ilə Çin internet istifadəçilərinin rəğbətini qazanıb. Xueba 01 robotu Şanxay Elm və Texnologiya Universiteti tərəfindən DroidUp Robotics şirkəti ilə əməkdaşlıq çərçivəsində hazırlanıb. Robotun əvvəlki versiyası bu ilin aprelində Pekində keçirilmiş dünyada ilk humanoid robotlar üçün yarımarafonda üçüncü yeri tutub. Şanxayın Shangguan News nəşrinin məlumatına görə, Xueba 01-in boyu 1.75 metr, çəkisi isə təxminən 30 kq-dır və o, insanlarla fiziki qarşılıqlı əlaqədə ola bilir.

     Onun yaradıcılarının sözlərinə görə, bu robot “gözəl yetkin bir kişi”yə bənzəyir. Müəyyən dərəcədə insan mimikasını təqlid edə bilir, çünki üzü elastik silikon dəri ilə örtülüb və əzələ bənzəri strukturlarla təchiz olunub. Ünsiyyət dili - Çin dilidir (birbaşa nitq). Elmi dərəcə əldə etmək üçün robot dram və kino sahəsində standart 4 illik kurs keçməlidir. O, ixtisaslaşma sahəsi kimi ənənəvi Çin operasını seçib. Təhsilin sürətləndirilmiş formatda olub-olmayacağı açıqlanmayıb. Amma bu məsələdə robotu müəllimlər məhdudlaşdıra bilər - çünki onlar, robotdan fərqli olaraq, ona gecə-gündüz fasiləsiz məlumat yükləyə bilməyəcəklər. Təhsil haqqı açıqlanmır. “Robot-elmlər namizədi” proqramı Şanxay Teatr Akademiyasının incəsənətlə texnologiyanın inteqrasiyasına yönəlmiş tədqiqat təşəbbüsünün bir hissəsidir. Təntənəli mərasim zamanı Xueba-ya virtual tələbə bileti təqdim olunub və onun elmi rəhbəri tanınmış şanxaylı rəssam və professor Yang Qingqing olub.

     Robotun tədris proqramına səhnə ustalığı, ssenari yazımı, səhnə tərtibatı və aktyorluq sənəti daxildir. O, dərslərdə iştirak edəcək, digər aspirantlarla birlikdə opera məşqlərinə qatılacaq və təhsilini dissertasiya üzərində işləməklə tamamlayacaq. “Robot qrup yoldaşları ilə ünsiyyət quranda bu, soyuq bir maşının insanlarla qarşılaşması deyil, müxtəlif növ nümayəndələri arasında estetik mübadilə idi” - deyə robotun kuratoru bildirib. Robot isə özünü “ənənəvi operanı öyrənmək üçün qabaqcıl texnologiyalardan istifadə edən süni intellektli bir sənətçi” kimi təqdim edir. O, dostlar qazanmağa, ssenariləri müzakirə etməyə, rəqs hərəkətlərinin təkmilləşdirilməsinə kömək etməyə ümid edir. Professor Yang qeyd edib ki, Xueba 01 kursu bitirdikdən sonra muzey və ya teatrda süni intellektlə işləyən ənənəvi opera rejissoru ola və ya öz robotlaşdırılmış incəsənət studiyasını aça bilər. Əgər robot imtahanlardan keçə bilməsə, özünü “sıfırlayacaq” və incəsənət muzeyində eksponata çevriləcək - heç olmasa bu yolla tarixdə iz qoymaq üçün.