ABŞ ştatları Uber-i məhkəməyə verir

    Technote.az "The Verge” platformasına istinadən bildirir ki, ABŞ-də 21 ştat və Kolumbiya Dairəsi (DC) Federal Ticarət Komissiyasının (FTC) Uber-ə qarşı açdığı məhkəmə iddiasına qoşulub. Yenilənmiş iddiaya əsasən, Uber istifadəçilərin razılığı olmadan Uber One abunəliyi üçün ödənişlər aparıb, pulsuz sınaq müddəti bitməmişdən əvvəl hesabdan pul çıxıb və abunəliklə nə qədər qənaət ediləcəyi barədə yanıldıcı məlumatlar verib.

    İddiaya görə, Uber One abunəliyini ləğv etmək də olduqca çətin proses olub: istifadəçilər bəzən 23 ekrandan keçməli və 32 ayrı əməliyyat icra etməli olublar. Bu isə istehlakçıların hüquqlarının pozulması kimi qiymətləndirilir. Məhkəməyə qoşulan ştatlar sırasında Alabama, Arizona, Kaliforniya, Konnektikut, İllinoys, Merilend, Miçiqan, Minnesota, Missuri, Montana, Nebraska, Nyu-Hempşir, Nyu-Cersi, Nyu-York, Şimali Karolina, Ohayo, Oklahoma, Pensilvaniya, Virciniya, Qərbi Virciniya və Viskonsin yer alır. Rəsmi açıqlamada bildirilib ki, yenilənmiş iddia Restore Online Shoppers’ Confidence Act və ştat qanunlarının pozulmasına görə mülki cərimələrin tətbiqini də tələb edir.

    Uber isə ittihamları rədd edib. Şirkət bildirib ki, hazırda abunəliyin ləğvi istənilən vaxt tətbiq daxilində mümkündür və bu proses əksər istifadəçilər üçün 20 saniyədən az vaxt aparır.