Amazon-a rəqib Stord 250 milyon dollar investisiya aldı

    Technote.az “TechCrunch” platformasına istinadən bildirir ki, ABŞ-nin elektron ticarət logistikası sahəsində fəaliyyət göstərən Stord şirkəti yeni investisiya mərhələsində 250 milyon dollar vəsait cəlb edib. Bununla da şirkətin bazar dəyəri 3 milyard dollara yüksəlib ki, bu da ötən ilki qiymətləndirmə ilə müqayisədə iki dəfə artım deməkdir.

    Yeni investisiya raunduna Strike Capital rəhbərlik edib. Raunda həmçinin Kleiner Perkins, Founders Fund, Franklin Templeton, Baillie Gifford, G Squared və Bond kimi iri investorlar da qoşulublar. 2015-ci ildə Sean Henry və Jacob Boudreau tərəfindən tələbə olduqları dövrdə yaradılan Stord elektron ticarət şirkətləri üçün anbar şəbəkəsi, inventar idarəetmə sistemləri və logistika həlləri təqdim edir. Şirkət özünü “Amazon-a alternativ” kimi təqdim edir. Stord brendlərə sürətli çatdırılma imkanları təqdim etməklə yanaşı, onların müştəri münasibətlərinə nəzarəti öz əllərində saxlamasına şərait yaratdığını bildirir.

    Pandemiya dövründə sürətlə böyüyən şirkət 2021-ci ildə “unikorn” statusu qazanmışdı. 2025-ci ildə isə 200 milyon dollarlıq investisiya cəlb edərək dəyərini 1,5 milyard dollara çatdırmışdı. Son investisiyadan sonra şirkətin ümumi topladığı vəsait təxminən 775 milyon dollara yüksəlib.