Amazon ABŞ-də 30 dəqiqəlik çatdırılma xidmətinə başladı

    Technote.az “TechCrunch” platformasına istinadən bildirir ki, Amazon ABŞ-də çatdırılma xidmətlərini daha da sürətləndirib. Şirkət yeni “Amazon Now” xidmətini təqdim edərək bəzi şəhərlərdə sifarişlərin cəmi 30 dəqiqə ərzində çatdırılacağını açıqlayıb.

    Yeni xidmət ilk mərhələdə Atlanta, Dallas-Fort Worth, Philadelphia və Seattle şəhərlərində istifadəyə verilib. Yaxın aylarda isə Austin, Denver, Houston, Minneapolis, Orlando, Oklahoma City və Phoenix şəhərlərinə də genişləndiriləcək. Şirkətin planına görə ilin sonuna qədər ABŞ-də on milyonlarla istifadəçi bu xidmətdən yararlana biləcək.

    “Amazon Now” vasitəsilə istifadəçilər minlərlə məhsulu 30 dəqiqə içində sifariş edə biləcəklər. Buraya ərzaq məhsulları, süd və yumurta, şəxsi gigiyena vasitələri, məişət məhsulları, elektronika, uşaq və ev heyvanları üçün məhsullar daxildir. Bəzi bölgələrdə isə alkoqollu içkilərin də çatdırılması mümkün olacaq. Xidmətin əksər ərazilərdə 24 saat işləyəcəyi bildirilir.

    Sifariş edilə bilən məhsullar Amazon-un rəsmi tətbiqi və saytında “30-minute delivery” etiketi ilə işarələnəcək. Qiymət məsələsində də şirkət rəqiblərlə rəqabət aparmağa çalışır. Prime abunəçiləri hər sifariş üçün 3,99 dollar ödəyəcəklər. Prime üzvü olmayan istifadəçilər üçün isə bu məbləğ 13,99 dollar olacaq. 15 dollardan aşağı sifarişlərdə əlavə xidmət haqqı da tətbiq ediləcək.