Amazon Pharmacy xidmətini genişləndirir

    Technote.az “Engadget” platformasına istinadən bildirir ki, Amazon eyni gündə reseptlə verilən dərmanların çatdırılması xidmətini daha da genişləndirəcəyini açıqlayıb. Şirkətin planına əsasən, 2026-cı ilin sonuna qədər bu xidmət ABŞ-də əlavə 4500 şəhər və qəsəbəni əhatə edəcək.

    Amazon Pharmacy ilk dəfə 2020-ci ildə iki günlük çatdırılma seçimi ilə istifadəyə verilmişdi. Sonrakı illərdə şirkət həm xidmətin sürətini artırıb, həm də əhatə dairəsini genişləndirib. 2024-cü ildə eyni gündə çatdırılma xidməti artıq ABŞ əhalisinin təxminən yarısına yaxın hissəsi üçün əlçatan olmuşdu. Yeni genişlənmə çərçivəsində hansı şəhərlərin siyahıya daxil ediləcəyi tam açıqlanmasa da, Amazon bildirib ki, eyni gündə çatdırılma xidməti ilk dəfə olaraq Idaho və Massachusetts ştatlarında da əlçatan olacaq. Əvvəllər bu xidmət əsasən Amazon-un aptek bölməsi açdığı logistika və paylama mərkəzlərinin yerləşdiyi ərazilərlə məhdudlaşırdı.

    Amazon Pharmacy istifadəçilərə yalnız eyni gündə deyil, həm də növbəti gün çatdırılma imkanı təqdim edir. Bəzi şəhərlərdə isə reseptlərin Amazon-un One Medical ofislərindən birbaşa götürülməsi də mümkündür.