Amazon saytında texniki problem: istifadəçilər bir müddət qiymətləri görə bilmədi

    Technote.az “Engadget” platformasına istinadən bildirir ki, Amazon bir müddət texniki problemlərlə üzləşib. Nasazlıq səbəbindən bəzi istifadəçilər sayta daxil ola bilməyib və məhsulların qiymətləri düzgün göstərilməyib.

     Problem ilk dəfə ABŞ vaxtı ilə saat 14:00 radələrində qeydə alınıb. Nasazlıqları izləyən platforma DownDetector həmin vaxt istifadəçi şikayətlərində kəskin artım olduğunu bildirib. Lakin saat 17:56-ya doğru şikayətlərin sayı xeyli azalıb və saytın işi tədricən normallaşmağa başlayıb.

     Hazırda Amazon ana səhifəsi açılır, məhsul səhifələrinə daxil olmaq və qiymətləri görmək mümkündür. Problemin pik vaxtında isə səhifələr bəzən ümumiyyətlə yüklənmirdi və istifadəçilərə “Bağışlayın, xəta baş verdi” məzmunlu mesaj göstərilirdi. Bəzi istifadəçilər hesablarına daxil olmaqda da çətinlik çəkdiklərini bildiriblər.

     Şirkət məsələ ilə bağlı açıqlama verərək bəzi müştərilərin alış-veriş zamanı problem yaşaya biləcəyini qəbul edib və problemin aradan qaldırılması üçün çalışdıqlarını bildirib.