Amazon Wish List-lərdə mühüm dəyişiklik edir

    Technote.az “Mashable” platformasına istinadən bildirir ki, Amazon istifadəçilərinin Wish List funksiyası ilə bağlı mühüm siyasət dəyişikliyi elan edib. Yenilik 25 mart tarixindən qüvvəyə minəcək.

    Şirkətin açıqlamasına görə, həmin tarixdən etibarən istifadəçilər artıq siyahılarındakı məhsullar üçün üçüncü tərəf satıcılardan alışları məhdudlaşdırmaq imkanına sahib olmayacaqlar. Bu isə o deməkdir ki, kiminsə paylaşılmış və ya açıq siyahısından hədiyyə alan şəxs məhsulu üçüncü tərəf satıcıdan da ala biləcək. Ən diqqətçəkən məqam isə ünvan məsələsidir. Amazon istifadəçilərə göndərdiyi məktubda bildirir ki, siyahıdan hədiyyə alındıqda sifarişin çatdırılması üçün istifadəçinin çatdırılma ünvanı satıcı və logistika tərəfdaşları ilə paylaşılacaq. Bundan əlavə, çatdırılma prosesi zamanı izləmə (tracking) və bildirişlər vasitəsilə ünvan məlumatı hədiyyəni alan şəxsə də görünə bilər.

    Əslində, ünvan paylaşımı tamamilə yeni praktika deyil. Əgər istifadəçi açıq siyahı yaradıb və həmin siyahıya ünvan əlavə edibsə, üçüncü tərəf satıcılar və çatdırılma şirkətləri vasitəsilə ünvan məlumatı müəyyən hallarda artıq görünə bilirdi. Yenilik ondan ibarətdir ki, artıq istifadəçilər üçüncü tərəf satıcılarını bloklamaq və ya alışları məhdudlaşdırmaq seçiminə malik olmayacaqlar.