İstintaqla bağlı məlumatı olan insanların sözlərinə görə, FBI, bazar günü, iyulun 14-də Donald Trump-ın qulağına xəsarət yetirən “Thomas Matthew Crooks” adlı təcavüzkarın telefonuna daxil olmaq üçün İsraildə yerləşən rəqəmsal kəşfiyyat şirkəti Cellebrite-dən dəstək alıb. FBI artıq Cellebrite-nin lisenziyalı proqram təminatından istifadə etsə də, təcavüzkarın yeni Samsung markalı Android cihazının olduğu və mövcud proqram təminatının cihazın parolunu sındıra bilmədiyi bildirilir. Bunun üzərinə isə Cellebrite-nin FBI-a texniki dəstək verdiyi və hələ inkişaf etdirilən yeni bir proqram təminatını köçürdüyü ifadə edilir.

     Yeni Cellebrite proqramı sayəsində telefonun kilidini açmağın təxminən 40 dəqiqə çəkdiyi bildirilir. Cellebrite proqramı, telefona daxil olmaq cəhdləri üçün milyonlarla kod yaradaraq, təkrar parol cəhdlərinin qarşısını alan telefonun daxili mexanizmlərindən yan keçmək də daxil olmaqla, müxtəlif üsullarla telefona giriş əldə edir. Cihazın kilidini açmaq üçün hansı üsuldan istifadə edildiyi barədə heç bir təfərrüat yoxdur. Cellebrite, əvvəllər proqram təminatının fəallara qarşı istifadə edildiyini iddia edən məxfilik müdafiəçilərinin tənqidi ilə üzləşmişdi. Şirkət, 2021-ci ildə bu narahatlıqlara görə Çin və Honq Konq da daxil olmaqla bəzi bölgələrdə fəaliyyətini dayandırdığını açıqlamışdı. Cellebrite, həmçinin vurğulayır ki, onun proqram təminatı yalnız qanunla təsdiq edilmiş hallarda ələ keçirilən telefonların kilidini açmaq üçün istifadə olunur və heç vaxt nəzarət məqsədləri üçün istifadə edilmir.