Letterboxd uzun müddətdir ki, film həvəskarlarının izlədikləri filmlər barədə fikirlərini bölüşdüyü əsas platformalardan biri olub. Platforma artıq istifadəçilərə yalnız filmlər haqqında danışmaq deyil, həm də onları birbaşa Letterboxd daxilində izləmək imkanı təqdim etməyə hazırlaşır.

 Şirkət elan edib ki, yaxın günlərdə “Video Store" adlanan yeni funksiyanı istifadəyə verəcək. Bu funksiya “Letterboxd daxilində film icarəsi platforması” kimi təqdim olunur və istifadəçilərə filmləri elə tətbiqin özündən icarəyə götürüb izləmək imkanı yaradacaq. Yeni platforma iOS, Android, Apple TV, Android TV, Chromecast və AirPlay ilə uyğun olacaq. Digər smart TV tətbiqləri isə hazırlıq mərhələsindədir.

 Filmlərin mövcudluğu və icarə qiymətləri istifadəçinin yerləşdiyi regiondan asılı olaraq dəyişəcək. Bu xüsusiyyət Letterboxd-un yeni funksiyasını Criterion Channel kimi platformalara bənzədir. Burada da müəyyən kolleksiyalar yalnız məhdud müddət ərzində əlçatan olacaq. Hələlik “Video Store” haqqında bəzi detallar açıqlanmayıb.

 Qeyd edək ki, bu addım platformanın 2023-cü ildə Kanada şirkəti Tiny tərəfindən 50 milyon dollara alınmasından sonra istifadəçilər arasında yaranan narahatlıqları bir qədər azaltmağa xidmət edir. Adətən böyük şirkətlərin kiçik yaradıcı platformaları satın alması mənfi dəyişikliklərə səbəb olur. Lakin Tiny-nin idarəçiliyi altında Letterboxd daha da inkişaf edib və istifadəçi təcrübəsini genişləndirən yeniliklər təqdim etməkdə davam edir.