Meta elektrik ticarəti biznesinə daxil olmaq istəyir

    Meta öz data mərkəzlərini enerji ilə təmin etmək üçün lazım olan yeni elektrik stansiyalarının tikintisini sürətləndirmək məqsədilə elektrik ticarəti sahəsinə daxil olmağa hazırlaşır.

    Bloomberg-in məlumatına görə, həm Meta, həm də Microsoft elektrik alqı-satqısı aparmaq üçün ABŞ federal qurumlarından icazə almağa çalışır. Apple isə artıq bu icazəni qazanıb. Meta bildirir ki, bu addım şirkətə yeni stansiyalardan uzunmüddətli enerji almaq öhdəliyi götürməyə, eyni zamanda riskləri azaltmaq üçün alınan enerjinin bir hissəsini “wholesale” enerji bazarında satmağa imkan verəcək.

    Meta-nın qlobal enerji bölməsinin rəhbəri Urvi Parekh deyib ki, elektrik stansiyası inşaatçıları enerji istehlakçılarının real risk götürməyə hazır olduğunu bilmək istəyirlər.

    Parekh əlavə edib ki, Meta prosesə daha aktiv müdaxilə etməsə, enerji istehsalının genişləndirilməsi şirkətin ehtiyac duyduğu sürətlə baş vermir. Bloomberg-in vurğuladığına görə, texnologiya şirkətlərinin geniş miqyaslı süni intellekt planları səbəbindən enerji tələbatı o qədər artıb ki, yalnız Meta-nın Luizianada tikdiyi data mərkəzi kampusunu enerji ilə təmin etmək üçün ən azı üç yeni qazla işləyən elektrik stansiyasının inşası tələb olunur.