Microsoft karbon investisiyalarını davam etdirir

    Technote.az “TechCrunch” platformasına istinadən bildirir ki, Microsoft-un karbon emissiyalarının azaldılması planlarından imtina etdiyi ilə bağlı iddialar fonunda şirkət yeni karbon çıxarılması müqaviləsi imzalayıb. Microsoft startap şirkəti olan BioCirc ilə 650 min metrik ton karbon çıxarılması krediti alınmasına dair razılaşma əldə edib. Bu həcm texnologiya nəhənginin əvvəlki müqavilələri ilə müqayisədə böyük olmasa da, diqqətçəkən məqam odur ki, sövdələşmə Microsoft-un karbon kreditləri alışını dayandırdığı barədə yayılan xəbərlərdən sonra baş verib. BioCirc bildirib ki, müqavilə may ayında həmin iddialardan bir neçə həftə sonra imzalanıb.

    Karbon çıxarılması bazarında Microsoft-un rolu olduqca böyükdür. Məlumatlara görə, şirkət qlobal karbon çıxarılması kreditləri bazarının 90 %-dən çox hissəsinə təsir edir. Bu isə o deməkdir ki, Microsoft-un qərarları sektordakı bir çox startapın gələcəyini müəyyən edə bilər. Microsoft-un baş dayanıqlılıq direktoru Melanie Nakagawa bildirib ki, şirkət proqramı dayandırmayıb:

    “Karbon çıxarılması proqramımız bitməyib. Dayanıqlılıq məqsədlərimizə uyğun olaraq bəzi hallarda alışların sürəti və həcmi yenidən qiymətləndirilə bilər.” Yeni müqavilə BioCirc-in 5 bioqaz layihəsini əhatə edir. Layihələrdə əsasən kənd təsərrüfatı tullantıları emal edilərək metan və karbon qazı əldə olunur. Ayrılan CO₂ xüsusi sistemlərlə tutulur və yeraltı dəniz rezervuarlarında saxlanılır, metan isə enerji istehsalında istifadə edilir.