Kəşf edilən baza, əslində ABŞ-ın 1960-cı illərdə Soyuq Müharibənin qızğın çağında inkişaf etdirdiyi mübahisəli bir layihə olan "Project Iceworm" çərçivəsində tikilmişdi. 1959-cu ildə inşasına başlanan Camp Century, Qrenlandiyanın strateji mövqeyindən istifadə edərək Sovet İttifaqına qarşı 600 ballistik nüvə raketini göndərmək üçün nəzərdə tutulmuşdu.

     Baza 30 metr dərinlikdə qazılmış tunellərdən ibarət idi və ümumilikdə 4000 kilometrlik bir şəbəkənin qurulması planlaşdırılırdı. Lakin buzlaqların davamlı hərəkəti və mühəndislik çətinlikləri səbəbindən layihə 1967-ci ildə tamamilə tərk edilib. NASA-nın UAVSAR sistemi əvvəlki texnologiyalardan çox daha detallı təsvirlər təqdim edərək bazanın fərdi strukturlarını və obyektlərini üzə çıxarıb. Əvvəllər sənədlərdə qeyd edilməyən detallar, "Project Iceworm"un miqyasını və mürəkkəbliyini ortaya qoydu. Ancaq bu kəşfin yalnız tarixi əhəmiyyəti yoxdur, eyni zamanda ciddi ekoloji riskləri də gündəmdədir. Çünki Camp Century-nin kəşfi, Qrenlandiyadakı buzlaqların sürətli əriməsi ilə ortaya çıxıb.

     Buzlaqların əriməsi yalnız milyonlarla kubkilometr suyun sərbəst buraxılmasına deyil, həm də bazada qalmış çirkləndirici maddələrin ətraf mühitə yayılmasına səbəb ola bilər. Əgər bu təhlükəli maddələr həqiqətən suya qarışaraq yayılsa, gələcəkdə ciddi ekoloji problemlərlə qarşılaşa bilərik. Qarşıdakı dövrdə aparılacaq tədqiqatlar həqiqəti üzə çıxaracaq.