Uber One ailə paylaşımını aktivləşdirib

    Technote.az “Engadget” platformasına istinadən bildirir ki, Uber One abunəçiləri üçün yeni ailə paylaşımı funksiyası istifadəyə verilib. Bu funksiya sayəsində istifadəçilər öz hesablarına bir əlavə yetkin şəxsi pulsuz əlavə edə bilirlər. Üstəlik, istənilən sayda yeniyetmə üzv də əlavə etmək mümkündür.

    Ailə üzvləri abunəçinin malik olduğu bütün imkanlardan istifadə edə bilirlər: pulsuz çatdırılma, xüsusi endirimlər və fərdi səfər kreditləri də daxil olmaqla. Üzv əlavə etmək üçün tətbiqin Account → Uber One → Manage Membership → Family Sharing yolunu izləmək kifayətdir.

    Uber həmçinin üzvlərə əlavə üstünlüklər təqdim edir. Şirkət bildirir ki, 2–25 dekabr tarixləri arasında bir milyondan çox səfər üçün pulsuz prioritet yüksəlişlər ediləcək. Bundan əlavə, texnologiya həvəskarları üçün xüsusi fürsət də var: Uber One abunəçiləri Uber Eats vasitəsilə Best Buy-dan 75 dollar və ya daha çox alış-veriş etdikdə, 25 dollarlıq erkən endirim əldə edə biləcəklər.