Xbox Developer Direct geri qayıdır: Fable, Forza Horizon 6 və yeni sürpriz

    Technote.az “The Verge” platformasına istinadən bildirir ki, Microsoft-un hər il keçirdiyi Xbox Developer Direct tədbiri bu il 22 yanvar tarixində baş tutacaq. Tədbirdə Xbox üçün hazırlanmış ən vacib oyunlardan bəzilərinə daha yaxından baxış təqdim olunacaq.

    Ən diqqətçəkən məqamlardan biri Forza Horizon 6 olacaq. Playground Games ilk dəfə oyunun real gameplay görüntülərini nümayiş etdirəcək. Artıq təsdiqlənib ki, Forza Horizon 6 bu dəfə Yaponiyada baş verir. Oyunçular Tokio şəhərinin neon işıqları, müasir arxitekturası və Yaponiyanın müxtəlif bölgələrini əhatə edən geniş açıq dünya ilə qarşılaşacaqlar.

    Digər böyük layihə isə Fable oyunudur. Microsoft oyunun buraxılışını 2026-cı ilə təxirə salsa da, Developer Direct zamanı yeni gameplay kadrları təqdim olunacaq. Xbox Wire-ın baş redaktoru Joe Skrebels-in sözlərinə görə, oyun seriya üçün “tamamilə yeni bir başlanğıc” olacaq və sehrli, eyni zamanda yumor dolu atmosfer vəd edir. Tədbirdə həmçinin Pokemon oyunları ilə tanınan Game Freak studiyasının yeni layihəsi Beast of Reincarnation ilk dəfə ətraflı göstəriləcək.