Siri səsli köməkçilərin reytinqində elə də yüksək yeri tutmur. Lakin Bloomberg-in insayderi Mark Gurman-ın sözlərinə əsasən yaxın zamanda bu vəziyyət dəyişəcək. Belə ki, Apple öz səsli köməkçisinin imkanlarını genişləndirməyi hədəfləyib. Məlumata əsasən şirkət onun aktivləşdirilməsi üsulunun dəyişdirilməsindən başlayacaq. Hal hazırda Siri-nin işə salınması üçün istifadəçi “Hey, Siri” səsli əmrini verməlidir. Lakin Apple şirkəti səsli köməkçinin yalnız “Siri” səsli əmri vasitəsilə işə düşməsini reallaşdırmaq istəyir.

    İlk baxışdan bu elə də böyük bir yenilik kimi görünməsə də, onu reallaşdırmaq üçün Apple səs tanıma modelini sıfırdan təlimatlandırmalı və onun çalışma dəqiqliyini yüksəltməli olacaq. Digər yenilik isə Siri-nin kənar tətbiqlərə daha sıx inteqrasiyası olacaq. Məsələn Siri hansısa tətbiqin işə salınmasına ehtiyac duymadan onun daxilindəki müəyyən əməliyyatı yerinə yetirə biləcək. Bəzi məlumatlara əsasən yenilənmiş Siri artıq gələn il istifadəyə veriləcək.