Amazon Alexa for Shopping-ə saxta mesajları yoxlayan AI əlavə…

    “Amazon” saxta mesajlarla mübarizə üçün “Alexa for Shopping” xidmətinə yeni süni intellekt funksiyası əlavə edib. Çərşənbə günü elan olunan yenilik istifadəçilərə şirkət adından göndərilmiş məktub və ya bildirişin həqiqi mesaj, yoxsa fırıldaq olduğunu soruşmağa imkan verir. “Amazon”un məlumatına görə, ildə təxminən 360 min müştəri belə şübhəli mesajları yoxlatmaq üçün dəstək xidmətinə müraciət edir.

    “Alexa for Shopping” mesajı “Amazon”un dünya üzrə göndərdiyi milyardlarla mesajla müqayisə edir. Süni intellekt göndərən tərəf, məzmun, göndərilmə vaxtı və mesajın metadatası kimi detalları təhlil edir və onun həqiqiliyini dəqiq təsdiqləyir. Şirkət bildirir ki, istifadəçilər daha çox şübhəli mesaj paylaşdıqca sistem yeni fırıldaq üsullarını daha yaxşı tanıyacaq.

    Yeni funksiya saxta sifariş təsdiqləri, “Prime” üzvlüyünün yenilənməsi, hesabın dayandırılması və bağlama çatdırılması barədə xəbərdarlıqları aşkar etməyə yönəlib. İş təklifi adı altında göndərilən fırıldaq mesajları da sistemin yoxladığı nümunələr sırasındadır. “Amazon” bu ilin əvvəlində şübhəli məktubların yönləndirilə biləcəyi “[email protected]” ünvanını istifadəyə verib. Eyni yoxlama şirkətin müştəri xidməti səhifəsindəki onlayn forma vasitəsilə də aparılır.

    Yenilik “Amazon”un “Alexa”nı alış zamanı köməkçi kimi inkişaf etdirmək strategiyasının davamıdır. Xidmət fərdiləşdirilmiş endirimləri tapır, alış bələdçiləri yaradır, gündəlik məhsulların yenidən sifarişinə kömək edir və məhsullar haqqında AI icmalları təqdim edir. “Alexa” həmçinin əlyazma alış siyahılarını rəqəmsal mətnə çevirə bilir.

    Şirkət çərşənbə axşamı “Alexa”ya maraq doğuran yeniliklər üçün bildiriş qurmaq imkanını da əlavə edib. İstifadəçi sevimli brendin yeni məhsulu, müəllifin yeni kitabı və ya musiqiçinin yeni albomu yayımlandıqda xəbərdarlıq ala bilər. Mesajların həqiqiliyini yoxlayan “Alexa for Shopping” funksiyası “Amazon”un həm veb saytında, həm də mobil tətbiqində əlçatandır.