Apple kiberhücum riskinə görə yeniləmə strategiyasını dəyişir

    Apple təhlükəsizlik yeniləmələrinin yayımlanma strategiyasında mühüm dəyişikliyə gedir. Şirkət bildirib ki, süni intellektin hakerlərin işini sürətləndirməsi səbəbindən təhlükəsizlik boşluqlarını aradan qaldıran yeniləmələr artıq əvvəlkindən daha tez istifadəçilərə təqdim ediləcək.

    İndiyədək Apple təhlükəsizlik düzəlişlərinin əksəriyyətini iOS-un böyük versiya yeniləmələri ilə birlikdə təqdim edirdi. Lakin şirkətin Reuters-ə verdiyi açıqlamaya görə, süni intellekt alətlərinin inkişafı məlum zəifliklərin istismar olunması üçün lazım olan vaxtı xeyli azaldıb. Bu isə Apple-ı yeniləmələri illik cədvəldən ayıraraq daha tez buraxmağa məcbur edir. Şirkətin sözlərinə görə, məqsəd təhlükəsizlik boşluğunu aradan qaldıran yeniləmənin istifadəçilərin cihazlarına hakerlər həmin boşluqdan istifadə etməzdən əvvəl çatdırılmasıdır.

    Apple vurğulayıb ki, söhbət yeni təhlükəsizlik texnologiyasından və ya yeni məhsuldan getmir. Dəyişiklik əsasən yeniləmələrin yayımlanma prosesinə aiddir. Bundan sonra bəzi təhlükəsizlik düzəlişləri növbəti böyük iOS versiyasını gözləmədən ayrıca yeniləmə şəklində təqdim ediləcək. Şirkət həmçinin qeyd edib ki, son yenilənmiş təhlükəsizlik boşluqlarının real hücumlarda istifadə edildiyinə dair hər hansı sübut yoxdur. Lakin Apple hesab edir ki, süni intellektin köməyi ilə hücum alətlərinin hazırlanması daha sürətli olduğu üçün boşluğun açıqlanması ilə onun istismar edilməsi arasındakı müddət əvvəlkindən daha riskli hala gəlib.

    Apple hələlik yeniləmələrin nə qədər tez yayımlanacağını və hansı təhlükəsizlik düzəlişlərinin erkən təqdim ediləcəyini açıqlamayıb. Lakin şirkətin qərarı texnologiya nəhənglərinin süni intellekt dövründə dəyişən kibertəhlükəsizlik reallıqlarına uyğunlaşmağa çalışdığını bir daha göstərir.