Apple macOS 27.3-də AI agentlərinə tam disk girişini çətinləşdirə bilər

    “Apple” gələcək “macOS” yeniləməsində süni intellekt agentlərinin diskə giriş qaydalarını sərtləşdirməyə hazırlaşır. Bu agentlər istifadəçinin adından müxtəlif tapşırıqları yerinə yetirən proqramlardır. İlkin kod dəyişiklikləri yeni qaydanın “macOS 27.3” versiyasında tətbiq oluna biləcəyini göstərir. Məqsəd istifadəçi tam anlamadan şəxsi məlumatlara geniş giriş alan və həmin məlumatlarla arzuolunmaz əməliyyatlar aparan agentlərin qarşısını almaqdır. Şirkətin məlumatına görə, belə icazənin verilməsi üçün istifadəçi daha açıq və birbaşa addım atmalı olacaq.

    Hazırkı “macOS” versiyalarında tətbiq icazəsi olmayan faylı açmağa çalışanda sistem bu sorğunu rədd edir. Ancaq tətbiq diskə tam giriş verilə bilən proqramların siyahısına avtomatik əlavə olunur. Tərtibatçılar da istifadəçini Parametrlər tətbiqindəki həmin bölməyə yönləndirirlər. İstifadəçi keçidi aktivləşdirərək “Full Disk Access”, yəni diskdəki bütün fayllara geniş giriş icazəsi verir. Beləliklə, tətbiqlərin bu icazəni istəməsi xeyli asanlaşır.

    “macOS 27.3” yeniləməsindən etibarən icazəsi olmayan fayllara giriş istəyən tətbiqlər həmin siyahıya avtomatik əlavə edilməyə bilər. Bu halda tətbiqi Parametrlərdə tapıb keçidi dərhal aktivləşdirmək olmayacaq. Hazırkı sınaq versiyasında tətbiqin ikonunu icazə panelinə daşıyaraq diskə tam giriş vermək olur. Dəyişiklik hələ hazırlanır və yekun versiyada başqa cür işləyə bilər.

    Problem xüsusilə “iMessage” məlumatlarını süni intellekt agentləri ilə paylaşmaq istəyən tətbiqlərə aiddir. Ayrı və məhdud icazə seçimi olmadığından bu proqramlar çox vaxt bütün diskə giriş istəyir. Bu da digər şəxsi faylları riskə ata bilər. Hazırlanması ehtimal edilən “Private Folders” funksiyası yalnız seçilmiş qovluğa, məsələn, “iMessage” məlumat bazasına giriş verə bilər. Ancaq funksiyanın necə işləyəcəyi və “macOS 27.3” versiyasına hazır olub-olmayacağı hələ məlum deyil.