Capcom ID xidmətindən 11,7 milyondan çox hesabın e-poçt ünvanı sızıb

    “Capcom” 11,7 milyondan çox “Capcom ID” istifadəçisinin məlumatlarının sızdığını təsdiqləyib. Kənar şəxs şirkətin onlayn üzvlük xidmətinə icazəsiz daxil olub. “Capcom ID” hələ də işləyir, amma oğurlanan elektron poçt ünvanları şirkətin adından göndərilən saxta məktublarda istifadə oluna bilər.

    Hadisə zamanı milyonlarla hesabın elektron poçt ünvanı ələ keçirilib. Bundan başqa, 43 hesabın doğum tarixi, cinsi, ölkə və ya region məlumatı, eləcə də ləqəbi sızıb. 196 hesabın şifrəsi isə icazəsiz dəyişdirilib. “Capcom”un məlumatına görə, müştərilərin bank kartı məlumatları sızmayıb.

    Hadisə 19 oktyabrda “Capcom ID” sistemində şübhəli fəallığın aşkarlanması ilə başlayıb. Şirkət sistemə girişi dərhal bloklayaraq hücumun səbəbini və miqyasını araşdırıb. Yoxlama zamanı sistemə icazəsiz giriş edildiyi təsdiqlənib. “Capcom” yerli polisə və təhlükəsizlik nəzarəti üzrə xarici məsləhət şurasına müraciət edib.

    Şirkət hücum üsulunu müəyyənləşdirdiyini və təhlükəsizlik boşluğunu bağladığını açıqlayıb. “Capcom ID” tələb edən xidmətlər, həmçinin “Street Fighter 6” daxil olmaqla onlayn oyunlar işləməyə davam edir. Oğurlanan məlumatlar “Capcom” adından göndərilən saxta mesajlarda işlədilə biləcəyi üçün istifadəçilərə şübhəli məktublara qarşı diqqətli olmaq tövsiyə olunur.