Capcom oyun hazırlığını süni intellektlə sürətləndirməyi planlaşdırır

    “Capcom” oyunların hazırlanmasında süni intellektdən daha geniş yararlanmağı planlaşdırır. Şirkət bu planı 2026-cı ildə keçirilən “Capcom Open Conference RE” tədbirində açıqlayıb. Proqramçı Satoshi Ishida çıxışında “RE Engine” oyun mühərrikinin gələcəyindən danışıb. Məqsəd böyük oyunların hazırlanmasına gedən vaxtı azaltmaqdır.

    Ishida deyib ki, “Resident Evil” kimi böyük layihələrdə sadə tapşırıqlar belə çox vaxt aparır. Şirkətin həlli AI texnologiyasını hazırlama prosesinə uğurla inteqrasiya etməkdir. Süni intellekt tərtibatçıların gündəlik işlərini sürətləndirəcək və bəzi mərhələləri daha səmərəli qurmağa kömək edəcək. Ancaq bunun üçün hansı alətlərin işlədiləcəyi açıqlanmayıb.

    “Capcom” daha əvvəl oyunlarda süni intellektin yaratdığı hazır materiallardan istifadə etməyəcəyini demişdi. Yəni şirkət personajları, təsvirləri və başqa məzmunu birbaşa süni intellektlə yaratmağı düşünmür. Hazırkı planda da əsas məqsəd oyunların hazırlanmasını sürətləndirməkdir. Bununla yanaşı, açıqlanan yol xəritəsi gələcəkdə bu texnologiyanın rolunun arta biləcəyini göstərir.

    Şirkət “RE Engine”i tədricən süni intellekt əsaslı oyun mühərrikinə çevirmək istəyir. Dəyişikliklər bir anda yox, addım-addım ediləcək. Ishida son məqsədi insanların və süni intellektin oyunları birlikdə hazırladığı gələcəyə keçid kimi təsvir edib. Maraqlıdır ki, “Capcom”un “Pragmata” oyunu da süni intellektin yarada biləcəyi təhlükələrdən bəhs edir.