Chrome-un yeni AI strategiyası məxfilik narahatlığı yaradıb

     Chrome son günlər iki fərqli hadisə ilə yenidən məxfilik müzakirələrinin mərkəzinə düşüb. Bir tərəfdən Google istifadəçilərin xəbəri olmadan kompüterlərə süni intellekt modeli yükləyir, digər tərəfdən isə saxta AI əlavələri istifadəçilərin axtarış məlumatlarını oğurlayır.

    Məlumata görə, Google ən azı aprel ayından etibarən uyğun kompüterlərə Gemini Nano adlı yerli süni intellekt modelini avtomatik şəkildə endirməyə başlayıb. Təxminən 4 GB həcmində olan bu fayl istifadəçidən heç bir icazə istənilmədən arxa planda yüklənir və silindikdə yenidən endirilə bilir. Gemini Nano Chrome-un bəzi AI funksiyalarını, o cümlədən dələduzluq aşkarlanması və yazı köməkçisi kimi xüsusiyyətləri təmin edir. Bununla belə, bir çox istifadəçi kompüterində belə böyük bir faylın mövcudluğundan xəbərsizdir.

    Məxfilik üzrə araşdırmaçı Aleksandr Hanff bildirib ki, model heç bir istifadəçi əməliyyatı olmadan yeni Mac profilinə təxminən 14 dəqiqə ərzində quraşdırılıb. Onun fikrincə, bu cür gizli yükləmələr Avropanın məxfilik və məlumatların qorunması qaydaları ilə ziddiyyət təşkil edə bilər. Google isə bildirir ki, istifadəçilər fevral ayından etibarən Chrome parametrlərində bu funksiyanı deaktiv edə bilirlər. Şirkət həmçinin qeyd edir ki, cihazda yaddaş və ya enerji problemi yarandıqda model avtomatik silinə bilər.

    Bununla yanaşı, başqa bir təhlükə də ortaya çıxıb. Microsoft-un təhlükəsizlik mütəxəssisləri özünü AI axtarış sistemi kimi təqdim edən saxta Chrome əlavəsi aşkarlayıblar. "Search for perplexity ai" adlı bu genişlənmə istifadəçilərin ünvan sətrinə yazdıqları bütün axtarış sorğularını və bəzi texniki məlumatları hücumçuların serverlərinə göndərib. Microsoft daha əvvəl də AI mövzulu zərərli əlavələrin 900 mindən çox dəfə quraşdırıldığını və minlərlə şirkət şəbəkəsində istifadəçilərin süni intellekt söhbətlərinin oğurlandığını açıqlamışdı.

    Mütəxəssislər istifadəçilərə Chrome əlavələrini mütəmadi yoxlamağı, tanımadıqları genişlənmələri silməyi və AI adı altında təqdim edilən proqramları quraşdırmadan əvvəl onların mənbəyini diqqətlə araşdırmağı tövsiyə edirlər.