Çində ChatGPT vasitəsilə fake xəbərlər tərtib edərək onları yayan şəxs həbs edilib

    Çinin hüquq-mühafizə orqanları süni zəka əsaslı ChatGPT çat-botu vasitəsilə fake xəbərləri tərtib edərək onları sosial şəbəkələrdə yaymış şəxsi yaxalayıblar. Bu, Çində süni zəka əsaslı çat-botdan istifadə ilə bağlı ilk həbsetmə hadisəsidir. Hong soyadına sahib şəxs fake xəbərlərin tərtib edilməsi və onların sosial şəbəkələrdə yayılmasında süni zəka sistemindən istifadədə şübhəli bilinir. Çinin yerli polis xidməti 25 aprel tarixində baş vermiş qatar qəzasında 9 nəfər şəxsin öz həyatını itirdiyi xəbərinə diqqət yetirib. Əslində isə bu cür hadisə ümumiyyətlə baş verməyib.

    Hong soyadına sahib şəxs Baijiahao adlı sosial şəbəkədə bu xəbəri 20 ədəd hesabı vasitəsilə yayıb. Nəticədə 15 000 nəfər istifadəçi bu xəbərə diqqət yetirib. Hong, süni zəka tərəfindən tərtib edilməsi ilə bağlı xüsusi qeydə sahib olmayan fake xəbərin yayılmasında günahlandırılır. İndi isə ona 5 il azadlıqdan məhrum edilmə cəzası təyin edilə bilər. Hələ fevral ayında Çinin nizamlayıcı orqanları böyük şirkətlərə ictimaiyyətə ChatGPT-dən istifadə imkanlarının təqdim edilməsini qadağan etmişdi. Bundan əlavə olaraq yerli texnoloji şirkətlər ChatGPT-yə bənzər məhsulların hazırlanmasını və istifadəyə verilməsini dövlət ilə razılaşdırmalıdırlar.